QUICHES
Daar is niks so smaaklik soos ’n souttert of quiche nie. Maak dit ’n maaltyd op sy eie of geniet dit as bykos. Dis lekker koud óf warm.
TAMATIE-EN-FETA-TERTJIES
Maak 12 kolwyntjie-grootte tertjies
BESTANDDELE
Vir die kors 1½ koppies koekmeel ’n Knippie sout 6 eetlepels botter Yswater Vir die vulsel 2 – 3 middelslag tamaties, geskil, ontpit en in blokkies gesny 1/3 koppie fetakaas, verkrummel 3 eetlepels vars gekapte origanum 4 eiers 1 koppie room Varsgemaalde swartpeper vir garnering
METODE
Maak eers die kors: Sif die koekmeel en sout saam en vryf die botter met jou vingerpunte in totdat dit soos growwe mieliemeel lyk. Giet bietjies-bietjies yswater by en meng totdat jy ’n sagte hanteerbare deeg het. Bedek met kleefplastiek en laat vir 30 minute in die yskas rus. Rol die deeg uit op ’n meelbestrooide oppervlak, druk sirkels uit en voer die gate van ’n 12-gatkolwyntjiepannetjie daarmee uit. Prik die bodems van die deegdoppies, voer elkeen met ’n stukkie bakpapier uit en vul met keramiek- of gewone bone. Bak in ’n voorverhitte oond van 200ºC vir 10 minute. Verwyder die bakpapier en bone en bak oop vir nog 5 – 7 minute. Hou die korsbakkies eenkant terwyl jy die vulsel maak. Maak die vulsel: Verdeel die tamatieblokkies, feta en origanum tussen die 12 bakkies. Klits die eiers en room saam en vul elke bakkie met ’n bietjie van die eiermengsel. Bak vir 20 – 25 minute in ’n voorverhitte oond van 180ºC of tot gestol en liggoudbruin van kleur. Sprinkel varsgemaalde peper bo-oor en bedien. Dis warm of koud ewe lekker.