MURGPAMPOENTJIE-EN-TAMATIE
Genoeg vir 4 BESTANDDELE
Vir die kors 1½ koppies koekmeel ’n Knippie sout 6 eetlepels botter Yswater Vir die vulsel 3 eetlepels olie 3 – 5 murgpampoentjies, in muntstukkies gesny Sout en varsgemaalde swartpeper na smaak 4 ferm rooi tamaties of 8 dwergtamaties, in skywe gesny 13 basiliekruidblare (basil) 4 eiers 1 koppie melk
METODE
Maak eers die kors: Sif die koekmeelblom en sout saam en vryf die botter met jou vingerpunte in totdat dit soos growwe mieliemeel lyk. Giet bietjies-bietjies yswater by en meng totdat jy ’n sagte, hanteerbare deeg het. Bedek met kleefplastiek en laat vir 30 minute in die yskas rus. Rol die deeg uit op ’n meelbestrooide oppervlak en voer mini-quichepannetjies of ’n gesmeerde tert- of quichebord daarmee uit. Prik die bodem van die kors oraloor met ’n vurk. Plaas bakpapier bo-op die kors en giet keramiekbakbone of gewone droëbone of rys bo-op. Bak in ’n voorverhitte oond van 200⁰C vir 10 minute. Verwyder die bakpapier en bone en bak oop vir nog 5 – 7 minute. Hou die kors eenkant. Maak die vulsel: Verhit die olie in ’n pan en braai die murgpampoentjies daarin totdat dit sag, maar nog ferm is. Geur met sout en peper. Skep die murgpampoentjies uit en braai die tamaties effens in dieselfde pan. Versnipper die basil en sprinkel oor die kors. Rangskik die murgpampoentjie- en tamatieskyfies bo-op. Klits die eiers en melk saam, geur met sout en peper na smaak en giet in die kors. Bak vir 25 – 30 minute in ’n voorverhitte oond van 180ºC.
WENK: Indien jy nie vars basil het nie, kan jy 1 teelepel droë basil by die eiermengsel voeg.