BOTTERSKORSIE-EN-CHORIZO
Genoeg vir 4 – 6 BESTANDDELE
Vir die kors 1½ koppies koekmeel ’n Knippie sout 6 eetlepels botter Yswater Vir die vulsel 6 eetlepels olie 1 groterige botterskorsie, geskil, pitte verwyder en in blokkies gesny 1 eetlepel heuning 1 eetlepel paprika Sout en varsgemaalde swartpeper na smaak 100 g chorizo-worsies, in skyfies gesny 1 groot rooi soetrissie, wit gedeeltes en pitte verwyder en in repe gesny ¼ koppie vars gerasperde parmesaan 1 koppie melk 4 eiers
METODE
Maak eers die kors: Sif die koekmeel en sout saam en vryf die botter met jou vingerpunte in totdat dit soos growwe mieliemeel lyk. Giet bietjies-bietjies yswater by en meng totdat jy ’n sagte, hanteerbare deeg het. Bedek met kleefplastiek en laat vir 30 minute in die yskas rus. Rol die deeg uit op ’n meelbestrooide oppervlak en voer ’n gesmeerde tert- of quichebord daarmee uit. Prik die bodem van die kors oraloor met ’n vurk. Plaas bakpapier bo-op die kors en giet keramiekbakbone of gewone droëbone of rys bo-op. Bak in ’n voorverhitte oond van 200oC vir 10 minute. Verwyder die bakpapier en bone en bak oop vir nog 5 – 7 minute. Hou die kors eenkant. Maak die vulsel: Pak die botterskorsieblokkies in ’n oondroosterpan en besprinkel met 3 eetlepels van die olie, bedruip met die heuning, sprinkel die paprika oor en geur met sout en peper. Bak vir 30 minute of totdat die blokkies sag, maar nog ferm is in ’n voorverhitte oond van 200oC. Laat eenkant staan en afkoel. Verhit die res van die olie in ’n pan en braai die chorizo-skyfies daarin vir ’n minuut of twee. Voeg die soetrissie by en braai tot sag. Roer die botterskorsieblokkies en parmesaan by en skep in die kors. Klits die melk en eiers saam, geur met sout en peper en giet bo-oor. Bak vir 30 – 40 minute in ’n voorverhitte oond van 180oC of tot heeltemal gestol.