BEESKORTRIBPOTJIE
Genoeg vir 4 BESTANDDELE
1 kg beeskortrib ½ koppie meel ½ teelepel swartpeper 1 ui, gekap 1 selderystingel, gekap 2 lourierblare ¼ koppie worcestersous 2 koppies beesvleisaftreksel 4 aartappels, in groot stukke gesny 3 wortels, in groot stukke gesny
METODE
Skud die stukke kortrib, meel en peper saam in ’n plastieksak. Braai die vleis met die ui oor ’n hoë hitte in ’n enkellaag in ’n wye swaarboompan of die platboomswartpot waarin jy dit gaan maak. Pak dit daarna in die prutpot saam met die res van die bestanddele of voeg alles by die swartpot en bedek die bek met foelie en ’n deksel. In ’n prutpot: Kook op laag vir 8 uur of hoog vir 4 uur. Oor louwarm kole: Prut stadig vir 2½ uur. In die oond: Bak teen 150 °C vir 2½ uur. Of 100 °C vir 7 uur. Hierdie potjie is selfs nog beter die volgende dag. Verwyder die laag vet wat bo-op gevorm het voordat jy dit verhit. Bedien met gebotterde spruitkool en rys.