PIESANG-POEDINGKOEK

Genoeg vir 4 – 6

Hierdie is nie regtig ’n koek in die ware sin van die woord nie, want dit rys nie vreeslik baie nie. Dis meer ’n poeding in ’n koekvorm gebak. Die lekker lagie vars piesang tussenin is regtig iets besonders.

BESTANDDELE ¼ koppie (55 g) botter 2/3 koppie bruinsuiker 1 eier, geklits 2 –3 oorryp piesangs ¾ koppie volkoringbruismeel Varsgerasperde nutmeg (neutmuskaat)

METODE Klits die botter en suiker saam tot romerig. Klits nou die eier by. Hou ’n kwart van die piesangs eenkant en maak die res fyn en voeg dit by die bottermengsel. Vou die meel en nutmeg liggies met ’n vurk by. Skep die helfte van die deegmengsel ’n 15 cm-koekpan wat gesmeer is en met bakpapier gevoer is. Sny die oorblywende kwart van die piesang in dun skyfies bo-op en bedek met die res van die deegmengsel. Bak in ’n voorverhitte oond van 180°C vir 40 – 50 minute.

WENK: Bedien met vla, room of roomys.