Verdien met masseer
Dis ’n roeping en kuns om as skoonheidsterapeut mense met jou hande te laat ontspan.
Geraldine Coetzee (27), ’n skoonheidsterapeut van Vredenburg aan die Kaapse Weskus, glo sy kan met elke beweging van haar vingers elke kliënt laat ontspan en soos ’n nuwe mens laat voel.“Ek is seker daarvan dat enige mooimaak- of pamperlangsessie altyd die truuk doen.”
’n Groot glimlag beskryf sonder twyfel haar passie vir dié beroep. En ná sewe jaar in die bedryf, verruil sy dit vir niks anders in die wêreld nie.“Ek het van die begin af geweet wat ek met my lewe wil doen, al het ek aanvanklik gedink dit sou nie moontlik wees nie, weens finansiële redes.”
Presies tien jaar gelede het Geraldine opgewonde by die huis aangekom met ’n hoop voorstelle en pamflette van universiteite oor moontlike studierigtings. Maar ten spyte van al die breedvoerige inligting, het sy geweet al wat sy vir die res van haar lewe wil doen, is om haar liefde vir van skoonheid en gesondheid uit te leef.
“Toe my ouers hoor wat my planne is, het albei besluit ’n kursus in hierdie rigting is hopeloos te duur. Hul reaksie het my geskok en ek was diep seergemaak en teleurgesteld. Verder het my ouers ook aangedring ek studeer iets waar ek verseker is ek ’n beurs kan kry, juis omdat daar nie geld was vir verdere studies nie.”
En met die hulp van ’n beurs het Geraldine haar studies by ’n universiteit begin. Met haar oë steeds gefokus op haar droom om ’n skoonheidsterapeut te word, moes sy ná ’n jaar van studies eerlik wees en erken dat voedselwetenskap glad nie haar passie is nie.
Sy was vasbeslote om haar droom te volg en toe ’n geleentheid aanbreek om dit ’n realiteit te maak, het sy dit met albei hande aangegryp.“Ek het in Engeland gaan werk en ek wou seker maak dat ek genoeg geld bymekaar maak om vir hierdie duur kursus te betaal,”glimlag sy.
Geraldine kan nie uitgepraat raak oor haar beroep nie. Vandag werk sy by die Strandloper Ocean Boutique Hotel in Paternoster. “Nadat ek my kursus in skoonheidsterapie en laserterapie voltooi het, het ’n ongelooflike wêreld vir my oopgegaan. Eerstens bou jy wonderlike vriendskappe omdat jy so na aan mense werk. Dan is die opsie ook oop om die wêreld vol te reis. Beslis iets wat my altyd van hierdie beroep interesseer het.
“Die geneeskundige effek wat elke behandeling op mense het, is verstommend. En dit maak my bly, want dit is die rede hoekom hulle telkemale terugkom vir verdere behandelings.” Die verskillende behandelings wat Geraldine daagliks doen, sluit in:
Spa-terapie – om mense deur middel van aanraking te laat ontspan.
Laserterapie – laserstrale word vir skoonheidbehandelings gebruik. Byvoorbeeld om pigmentasievlekke of merke in die gesig te verwyder.
’n Loopbaan as ’n gesondheidsterapeut is ook nie so maklik as wat ’n mens dink nie. Jy moet hare op jou tande hê, veral omdat jy elke dag met verskillende mense te doen kry.“Ek het eenkeer ’n kliënt gehad wat effens bipolêr was en sy het vir 45 dae aaneen gekom en altyd volgehou dat sy by‘Gerry’wil wees. Ek moes haar heeldag pamper, soos twee tot drie facials ’n dag. Dit was heeltemal abnormaal. Sy het my regtig moeg gemaak. En ek kon nie nee sê of selfs ander voorstelle maak nie, ek moes net doen wat sy sê.
“As jy daarvan hou om met mense te werk, iemand is wat graag die wêreld vol wil reis en bereid is om hard te werk, dan is die beroep beslis vir jou. Dit is vir my die beste gevoel ooit as my kliënte waardeer wat ek doen.
“En met goeie ondersteuning soos wat ek deur my studies en regdeur my lewe beleef het, is dit moontlik om ’n sukses te maak van dié beroep”.
Hakim la Rocca, ’n masseerterapeut by die Whole Body-kliniek in Woodstock naby Kaapstad, leef elke dag sy liefde uit deur alle kliënte met sy hande te laat ontspan. Hy het jare se ondervinding waar hy ook by internasionale spa’s gewerk het.
Hakim sê die kliniek is ’n kalm en holistiese toevlugsoord wat ’n wye reeks behandelings rakende gesondheid, geneeskunde en verskeie vorme van massering en skoonheidsterapie aan kliënte bied.
“Treatments soos deep tissue massages, sport en Swedish massages en Thai-
massering is my specialty.”
Met ’n agtergrond op sportgebied, kombineer hy alle aspekte van sportmassering met Thai-massering en ontspanningstegnieke. “Hierdie tegnieke voorsien verskeie voordele aan my kliënte soos die verligting van stywe spiere, vinniger herstel ná sportaktiwiteite en selfs die verligting van hoofpyne wat deur spanning veroorsaak word.
“My treatments is voordelig vir sportiewe mense, studente wat onder geweldige stres is, en selfs vir diegene wat oor hul welstand besorgd is.”
Tammy Lloyd, hoof van die Beauty Therapy Institute in Randburg, verduidelik ’n masseerterapeut kan enige vorm van massering uitoefen. Afhangend natuurlik van in watter soort vaardigheid jy opgelei is.
“’n Skoonheidsterapeut kan meer behandelings doen, byvoorbeeld soos facials en laser treatments. Maar dit hang ook af waarin die persoon opgelei is. Dit tel reg vanaf die begin waar die basiese dinge gedoen word tot by meer gespesialiseerde vaardighede soos gevorderde facials met peelings.”
Tammy, wat haar twee jaar diploma in skoonheidsterapie voltooi het, het meer as 14 jaar se ondervinding in die bedryf. “Ons studente word geleer om op ’n holistiese manier om te sien na ons kliënte se velsorg en gesondheid. Dit word bereik deur die vaardigheid en opleiding wat in ons sertifikate en diploma-kursusse gebied word.” Werkgeleenthede (vir dié wat ten volle opgelei en gekwalifiseerd is), sluit in: Cruise ship Spa-terapeut Verkoopsagente Produkopleiers
Waar studeer ek?
Total Concept – Clinic and Spa Academy in Port Elizabeth Tel: 041 365 1472 Faks: 041 364 1718 E-pos: info@totalconcept.co.za
Beauty therapy institute – Bied voltydse en deeltydse programme aan in onder meer gesondheid, skoonheid, masseer- en velsorgterapie.
Woodstock-kampus: Tel: 021 404 0556 Faks: 021 404 0558 Webwerf: www.beautytherapyinstitute.co.za
Randburg-kampus: Tel: 011 024 2054 Faks: 086 531 9776 Isa Stellenbosch-kampus:Carstens Tel: 021 883 9777 Faks: 086 742 2060 E-pos: info@isacarstens.co.za of marketing@isacarstens.co.za
Pretoria-kampus: Tel: 012 348 0125 Faks: 086 742 2131 E-pos: infopta@isacarstens.co.za of marketingpta@isacarstens.co.za Healing Hands International Massage Academy Tel: 081 008 8663/079 396 8507 BBM: 7E019531 Faks: 086 671 0528