Wêreldbeker-koors

Krieketkenner JOHNNY DAVIDS sê vir wie ons in die Wêreldbeker moet uitkyk.

Johnny Davids, Afrikaanse krieket- en rugbykommentator by Supersport en ankeraanbieder van die krieketgeselsprogram BVP op kykNET, deel sy indrukke oor die opkomende Wêreldbeker-kriekettoernooi en sê wie is van die voorste spelers wat ons moet dophou.

Top-kolwers

AB De Villiers (SA)

Abraham Benjamin de Villiers kon net sowel ’n kranige rugbyster gewees het, miljoene uit gholf verdien het of al verskeie groot Grand Slam-titels in tennistoernooie verower het, maar hoe dankbaar is SA en die Proteas nie om die wêreldgehalte sportman aan hulle kant te kan hê nie. ’n Afgeronde sportman wat tans die ganse krieketgemeenskap aan die praat het, veral ná die uitstekende beurt onlangs teen die Wes-Indiese Eilande op die Wanderers in Johannesburg, toe hy rekord ná rekord verbeter het; 149 lopies van net 44 balle. Tans die wêreld se voorste kolwer in eendagkrieket, spog hy met ’n treftempo (strike rate) van byna 100 en ’n fantastiese gemiddelde van 52,39. Die SA-kaptein is die spilpunt waarom alles sal draai, want elke keer dat hy die kolfkampie betree en ’n goeie vertoning lewer, wen die Proteas gewoonlik meer wedstryde. Hy het die ver- moë om ’n situasie en kolfblaaie blitsvinnig op te som, en daarby aan te pas.

SA is in Groep B geloot met Indië, Pakistan, Wes-Indiese Eilande, Zimbabwe, Ierland en die VAE. SA behoort in die eindstryd te speel.

Kumar Sangakkara (SL)

Ervaring speel altyd ’n belangrike rol in ’n groot toernooi soos die Wêreldbeker, en Sangakkara het tonne hiervan. Op die ouderdom van 37 jaar en reeds byna 400 internasionale eendagwedstryde op sy kerfstok, gaan hy beslis ’n faktor wees. In 2011 en 2013 was hy die Internasionale Krieketraad (IKR) se Eendagspeler van die Jaar. Sri Lanka kon net al een keer die Wêreldbeker verower (1996), en met Sangakkara se loopbaan wat na die einde se kant toe staan, sal hy baie gemotiveerd wees om die beker vir sy span te help wen. Dis veral sy vertonings die afgelope 12 maande wat ’n mens laat glo dat hy boulers hoofbrekens gaan besorg: 1256 lopies teen ’n gemiddeld van 46, wat vier 100-talle en agt 50-talle insluit. Sri Lanka is in Groep A geloot met Engeland, Australië, Bangladesj, Afghanistan, Nieu-Seeland en Skotland. Sri Lanka behoort tot die halfeindstryd deur te dring, as alles volgens plan verloop.

Virat Kohli (IND)

Op 26-jarige ouderdom het hy al die wêreld se ervaring van meer as 150 eendagwedstryde, wat terloops een-entwintig 100-talle en drie-en-dertig 50-talle insluit. Dié regterhandse kolwer van Indië het ook ’n uitstekende treftempo van 90,38. Saam met Mahendra Singh Dhoni, sal hy een van die planmakers in die span wees, bloot oor die feit dat hy al die span aangevoer het. Glad nie op sy bek geval nie en sê gewoonlik sy sê in die media en op die veld, maar hy laat ook die kolf die meeste van die praatwerk doen. Indië is tans die huidige wêreldkampioene, maar vaar gewoonlik nie te waffers buite die grense van hul land nie. Maar wee o wee, Virat Kohli kan dié stukkie statistiek baie vinnig verander. Indië kan tot die kwarteindstryd deurdring.

ShaneWatson (AUS)

Watson bring ’n kalmte in enige span waarin hy speel; hoekom? Ervaring van meer as 180 eendagwedstryde. Ook die balans van die Australiese span is beter wanneer Watson speel, want hy is een van die naatboulers en daarmee een van die wêreld se