BABA-ONTVOERING: Zephany-storie moet nog lang pad loop
Op 27 April is sy 18 en dan kom daar dalk ’n nuwe wending, want die media is soos aasvoëls op haar spoor . . . DEUR ERNUSTA VAN WYNGAARD
Storie het lanklaas die verbeelding so aangegryp, soos dié van Zephany Nurse wat gevind is 17 jaar nadat sy as baba uit Groote Schuurhospitaal ontvoer is.
Sedert haar ware identiteit einde Februarie bekend geword het, het plaaslike en internasionale media mal gegaan en die stories was oral. Zephany is op 27 April 1997 gebore en drie dae later uit die hospitaal ontvoer. Celeste onthou ’n vrou in ’n verpleeguniform was by haar bed en het Zephany vasgehou. Toe sy wakker skrik, was Zephany weg, maar haar familie het haar nooit vergeet nie.
Die wonderwerk van die storie is dat dit Zephany se eie suster, Cassidy (14), is wat haar opgespoor het. Hulle is by dieselfde skool en Cassidy (graad 8) het Zephany (matriek) bevriend nadat leerders opgemerk het hoe baie hulle na mekaar lyk.
Die Valke is ingeroep en het deur middel van ’n DNS-toets bevestig Zephany is die Nurses se verlore dogter. Die“goeie”nuus is dat Zephany goed na gekyk was en selfs Celeste het in onderhoude die ontvoerder daarvoor bedank.
Sedert einde Februarie is Zephany in ’n plek van veiligheid, maar die naam wat sy die afgelope 17 jaar gebruik, mag nie bekend gemaak word nie aangesien sy minderjarig is. Sy word egter op 27 April 18 en ingevolge wet is daardie verbod nie meer van toepassing nie.
Ons sustertydskrif YOU het egter berig prof. Ann Skelton van die Sentrum vir Kinderregte het ’n ooreenkoms tussen Zephany, die Nurses en haar grootmaakpa (die ontvoerder se man) bemiddel.
Volgens die berig behels die ooreenkoms onder meer waar sy gaan bly en hoe sy spesiale geleenthede gaan vier. Die ooreenkoms is klaarblyk na aanleiding van Zephany se wense, maar die volledige besonderhede is vertroulik.
MEDIASENSASIE Sedertdien het Zephany se storie mediaopskrifte oorheers en is haar grootmaakma in hegtenis geneem. Teen druktyd was sy steeds uit op borgtog van R5 000.
Celeste en Morné self het ’n mediasensasie geword. Hulle is selfs al daarvan beskuldig dat hulle geld maak uit die storie en uitsoekerig is oor watter media hulle mee praat, maar het dit ontken. Celeste en Morné het ook laat weet Zephany gaan nie enige onderhoude toestaan nie.
Zephany het egter ’n verklaring by monde van prof. Skelton uitgereik, waarin sy sê:“Ek wil almal bedank wat my deur alles ondersteun het; wat aanhoudend vir my bid en nooit opgegee het om my te soek nie. Onder die omstandighede, is ek fine. Daar is baie emosies en gedagtes waardeur ek moet werk, maar ek weet ek kan dit hanteer.”
In ’n onderhoud met Eyewitness News op 10 Maart het Morné wel gesê hy en Zephany het ’n band gevorm. Celeste het ook herhaaldelik bevestig dat hulle Zephany se ontvoerder vergewe het.
Openbare kommentaar dui ook daarop dat mense verdeeld is oor wat die“gepaste”straf vir die ontvoerder moet wees.
HOEKOM ’N KIND STEEL? In 2011 het ’n soortgelyke storie hom in Amerika afgespeel toe Carlina White (nou 28), met haar biologiese familie herenig is nadat sy in 1987 uit ’n hospitaal ontvoer is. Sy was toe 19 dae oud toe sy gesteel is en het dit eers 23 jaar later uitgevind.
Haar grootmaakma, Ann Pettway (54), is in 2012 tot 12 jaar tronkstraf gevonnis. Sy het erken sy kon nie kinders hê nie. Luidens ’n berig in die Kaapse dagblad
Son het Zephany se grootmaakma al talle miskrame gehad en het sy en haar man die Nurse-familie goed geken. Haar man was ook ’n visserman en daar word gespekuleer dat sy dalk vir Zephany ontvoer het om nóg ’n miskraam te verberg.
Die National Center for Missing & Exploited Children in Amerika het die volgende profiele saamgestel van vroue wat babas ontvoer:
Sy is gewoonlik tussen 12 en 55 en lyk oorgewig – iets wat ’n swangerskap kan voorstel.
Sy is geneig om kompulsief te wees en gebruik manipulasie, leuens en bedrog.
Sy dui gereeld aan dat sy ’n kind verloor het of nie een kan hê nie. In baie gevalle is sy getroud of bly saam en haar motivering (om ’n kind te steel) kan wees omdat haar maat een wil hê of omdat die ontvoerder vir haar maat sy eie kind wil gee.
Sy bly gewoonlik in die gemeenskap waar die ontvoering plaasvind.
Sy besoek voor die ontvoering gereeld kinder- en kraameenhede.
Sy beplan gewoonlik die ontvoering, maar het nie noodwendig ’n spesfieke