Alle kinders onder drie moet nou in karstoeltjies sit
Ingevolge wet moet alle kinders onder drie deesdae in ’n karstoeltjie vasgegordel wees, maar dit kan ’n duur storie raak. En is dit werklik toepasbaar?
Verby is die dae wat kleinding voor op ma se skoot kon sit of op die agterste karsitplek kon staan, selfs as daar net vinnig kafee toe gery word.
Alle motoriste word vanaf 30 April verplig om kinders jonger as drie in ’n karstoeltjie vas te gordel. Hoewel soortgelyke wetgewing wêreldwyd toegepas word, is dit ’n eerste vir Suid-Afrika, waar net volwassenes en ouer kinders tot dusver verplig was om ’n sitplekgordel te dra.
Die gewysigde regulasie is net op private voertuie van toepassing. Dit beteken dat voertuie wat mense teen vergoeding vervoer, soos minibus-taxi’s en busse, daarvan vrygestel is. Is jy egter lid van ’n saamryklub wat kleuters vervoer, sal jy van nou af moet sorg dat elke kind jonger as drie veilig in ’n stoeltjie sit.
Volgens Childsafe SA het ’n kind wat nie in ‘n karstoeltjie is nie, ’n vyf keer groter kans om in ’n ongeluk te sterf as een wat wel vasgemaak is. Wanneer ’n voertuig skielik teen 120 km/h stop, word ’n los kind agter in die voertuig ’n projektiel met ’n goeie kans om te sterf en selfs die voorste passasier of bestuurder te tref, verduidelik Marius Luyt, nasionale woordvoerder van die Automobiel-Assosiasie (AA).
’n Studie deur die Mediese Navorsingraad het bevind 250 kinders sterf jaarliks in Suid-Afrika in padongelukke net omdat hulle nie vasgegordel is nie.
Hoewel die meeste ouers oënskynlik die wetgewing steun, blyk dit uit kommentaar op die sosiale media dat ’n vrees vir die gevolge van ’n kaping een van die hoofredes is hoekom sommige mense verkies om nie hul kinders vas te gordel nie.
Salome Strydom van Springs is een van verskeie ma’s én pa’s wat haar kommer uitgespreek het dat kapers makliker met ’n vasgegordelde kind kan wegjaag. Die dood van die vierjarige Taegrin Morris van Boksburg – wat verlede jaar deur kapers saamgesleep is nadat hy in die veiligheidsgordel verstrengel geraak het terwyl sy ma besig was om hom los te maak – is immers nog vars in die geheue.
Alta Swanepoel, ’n konsultant wat in padverkeerswetgewing spesialiseer, beklemtoon egter dat ’n wet nie vir ’n misdaadsituasie geskryf word nie, maar vir ’n alledaagse situasie.
“Hierdie redenasie is soortgelyk aan dié van mense wat sê hulle gaan nie in die