LYNETTE WYS HAAR MAYA
Ná haar baba se geboorte, het Lynette Francis se lewe heeltemal verander. Maar nou kan sy haar lewe nie sonder haar dogter voorstel nie.
Wanneer Lynette Francis liefdevol om haar babadogter, Maya Milagro (vyf maande), koer is dit moeilik om te glo daar was ’n tyd toe sy gedink het kinders sal nooit deel uitmaak van haar lewe nie.
Haar werkskedule is só intens en sy kon nie sien hoe ’n kind daarin gaan pas nie.
Maar min het Lynette, SABC2-nuusleser en RSG-aanbieder, geweet ’n klein mensie wat onverwags haar opwagting gemaak het, gaan haar lewe handomkeer verander en met teer, lomp vingertjies boonop aan haar selfvertroue kom krap.
Lynette is ’n selfversekerde en sterk vrou, wat presies weet wat sy uit die lewe wil hê, maar erken in die eerste maand ná Maya se geboorte was dit die eerste keer in haar lewe dat sy onseker was van haarself.
Maar sy het gou geleer wat haar dogter wil hê wanneer sy huil en sedert Lynette vir Maya in ’n roetine gekry het, gaan dit klopdisselboom. Lynette erken egter elke dag is steeds ’n aanpassing en sy moet juggle om die regte balans te vind.
Een van die groot dinge wat Lynette vinnig moes aanleer, was dat haar skedule by Maya s’n moet aanpas – nie andersom nie. Sy moes ook vinnig leer wanneer jy ’n baba het, het jyself nie meer baie beheer oor dinge nie.
Om Lynette se moederskapreis in woorde uit te druk, is een ding, maar om in persoon te sien hoe sy gloei en vir Maya met moederlike behendigheid hanteer, is regtig ’n prentjie om te aanskou. Lynette straal ook ’n sagtheid uit en is opreg wanneer sy van ander ma’s se uitdagings hoor.
Diegene in haar binnekring ken al haar fasette van vrouwees, sê Lynette, maar vir ons (in Kuier- land) wat Lynette van TV en radio af leer ken het, is dit Lynette soos ons haar nog nooit vantevore gesien het nie. Hierdie sagte, dog ferm kant is beautiful en ons love dit!
Maya het die aand voor die onderhoud net een keer wakker geskrik en dit het by-
gedra dat Lynette heeltemal ontspanne en vol grappies was toe sy, Maya en haar ma, antie Sarah, vir ons afspraak opdaag.
“Jy sal nie verstaan hoe happy ek is wanneer sy deurslaap nie! Sy eet nou ook en alles is ’n fees,”sê Lynette borrelend.
Lynette wys Maya vir die eerste keer in die“tradisionele”media en ons voel geëerd dat sy hierdie spesiale oomblik met die
Kuier- gemeenskap deel.
’n VERRASSING
Lynette begin vertel sy was vir ’n maand lank in skok nadat sy uitgevind het sy is swanger. Sy was toe alreeds 14 weke (drie maande en twee weke) swanger en in haar tweede semester.
“Ek wou nooit ’n baba hê nie, want ek het gedink waar pas ’n baba in my skedule en ook wat dit kos om een groot te maak.”
Haar vrese was ook glad nie ongegrond nie, het Lynette uitgevind. Sy lyk steeds geskok wanneer sy praat oor wat dit kos om ’n kind groot te maak.
“Ek weet eerlikwaar nie hoe iemand ’n kind met ’n staatstoelaag grootmaak of selfs hoe mense met meer as een kind dit doen nie!”
Nadat Lynette oor haar skok gekom het en op die sonar gesien het hoe woelig Maya was, het sy gedoen wat so baie moderne ma’s deesdae doen – om te lees en te lees. Sy het ook baie vir haar vriende, wie reeds kinders het, uitgevra.
“Toe Maya in haar eerste maand lyk of sy koors het, het ek dit ge-Google sodat ek kon weet of dit regtig koors is,”sê sy laggend. Maar Lynette het ook haar ma, ’n verpleegster, gevra wat sy als moes koop om Maya op die“tradisionele”manier uit te smeer.
Lynette sê trots sy het self die rooilaventel-en-soetolie-mengsel aangemaak en Maya geniet dit baie wanneer sy haar boude en rug uitsmeer.
Op ’n ernstige noot, sê Lynette sy het nie haar kop gebreek oor die“biologiese horlosie”of die ouderdom waarop sy swanger geword het nie.
“Ek was meer bekommerd oor die vorige weke se dansery en sushi. Die ginekoloog het gesê ons moet seker maak als is oukei. Ek het nooit enige bekommernisse of vrese gehad nie. Die Jode praat van‘beshert’, wat beteken dis só bestem. Dis wat ek glo,”sê Lynette.
Sy was een van daardie gelukkige vroue wat ’n gesonde swangerskap sonder enige probleme, behalwe erge sooibrand hier teen die einde, gehad het. Sy het selfs nog die week voor Maya se geboorte op 5 Desember 2014 gewerk en hoef nie eens groter klere te gekoop het nie. (Maya het ook ’n week vroeër as verwag gekom).
Sy vertel ook heel spoggerig swangerskap het haar hare mooi laat groei, danksy die hormone.
Lynette was baie geraak deur mense se reaksie op haar swangerskap. Dit het haar egter effens onkant gevang (maar op ’n goeie manier) wanneer haar manlike nuuskollegas by die SABC gereeld wou weet hoe die swangerskap vorder.
En al is sy bekend, het dit darem nie gebeur dat wildvreemde mense aan haar swanger maag gevat het nie.
“Mense is versigtig vir my en sal nie aanmatigend wees om (aan my maag) te gevat het nie. Maar die luisteraars en kykers het gereeld e-posse gestuur en raad gegee. Die dag toe dit (swangerskap) rugbaar word, het ’n 70-jarige oom geskryf ek moet nou besef ek kan nie meer so rondrits met my reise nie en dat dit nou nie net oor my lewe gaan nie. Dit is wat my die meeste getref het: luisteraars en kykers se geskenke van wolskoentjies en truitjies wat hulle gepos het. En ek laat Maya dit dra, want dis hul liefde in my blydskap,” antwoord sy sag.
PURE BLYDSKAP
En absolute vreugde en blydskap is wat Maya Milagro in haar lewe gebring het. Lynette hoef dit nie eens te sê nie, want aan die manier hoe sy gloei – selfs sonder grimering – is dit duidelik sy kan haarself nie meer ’n wêreld sonder haar prinses voorstel nie.
Maya se ouma Sarah kan ook nie genoeg van haar enigste kleinkind kry nie en Lynette moet soms met haar skel om Maya te laat huil en nie dadelik op te tel nie sodat sy kan leer om haarself te paai.
Maya se naam is ook nie net randomly gekies nie en dis iets waaroor Lynette baie gebid het.
“Ek wou hê haar naam moes iets van ons verhouding met God weerspieël. Milagro beteken‘wonderwerk’in Spaans. Ek het op haar eerste naam besluit en haar pa op haar tweede naam. Toe hy dit aan my noem, het ons geweet dis reg. Ons gebruik haar volle name wanneer sy hardkoppig raak,”voeg Lynette teer by.
Tot dusver is moederskap, net soos wat haar swangerskap was, ’n fees vir Lynette. Maya skrik soms nog twee keer per nag wakker, maar Lynette sê sy gaan nie jok en maak asof sy in beheer is soos wat sy voor Maya se geboorte was nie.
“Ek het verlede jaar tydens my swangerskap by die Universiteit van Kaapstad studeer en vanjaar doen ek dit by Wits. Dis deksels moeilik om te werk, te kook, swot en na haar om te sien. Ek is baie handson en beplan haar roetines. Soms is daar balans, maar dikwels is my behoeftes sekondêr. My kop is vol lysies en regmerkies. Soms is dit oorweldigend. Soms smeek ek haar om ’n bietjie langer te slaap sodat ek ’n uiltjie kan knip,”sê Lynette oor die realiteite van ’n werkende ma.
Noudat sy self ’n ma is, is Lynette ook nog meer dankbaar dat haar ma ’n verpleegster is, want dit stel haar meer gerus. Maar die ding waaroor Lynette die dankbaarste is, is die standaard van moederskap wat haar ma stel.
“My ma is alles wat ek vir my dogter wil wees. Sy is ferm, maar liefdevol; vermaaklik, maar ondersteunend en baie snaaks. Ek was so bly my ma kon die fotosessie met
Kuier bywoon,”sluit Lynette dankbaar af.