Hallo Kuier-mense

Ek het pas besluit Mei is my nuwe gunsteling-maand! Dit was wonderlik om te hoor hoe baie van julle die CD geniet. Dit maak regtig al die harde werk die moeite werd. En hierdie uitgawe is net so spesiaal, danksy Lynette Francis wat Kuier gekies het om die eerste keer haar dierbare klein Maya in ’n tydskrif te wys en oor haar nuwe rol as ma te gesels. Moet ook nie die wonderlike inspirasiestorie van landdros Gregory Derris mis nie, want jy sal met nuwe oë na gestremdes kyk.

Baie dankie ook aan almal wat ons Moedersdagfunksie so ’n fantasmagoriese gebeurtenis gemaak het. Die kunstenaars was almal puik en danksy die borge kon ons ons lywe ’n behoorlike tyd gee! Ek wil spesiaal vir Revlon Realistic noem, want hulle gaan regtig uit hul pad. En toe hulle hoor hoe gou die kaartjies na ’n Kuier

funksie uitverkoop en hoe baie lesers teleurgesteld is omdat hulle nie kaartjies kan kry nie, het hulle besluit hulle wil ’n plan maak. Blaai na bladsy 26 om te kyk hoe jy vanjaar in styl Pienk Plesier kan bywoon.

Vir almal wat vra vir nog patrone, het ons baie goeie nuus. Ons is druk besig om KuierWinterCombo klaar te maak en dis propvol brei- en hekelpatrone. Natuurlik kry julle ook lekker resepte (almal nuut) by. Dis landwyd vanaf 1 Junie teen slegs R20 te koop. Moet dit nie misloop nie! Dan is dit uiteindelik my beurt om ’n bietjie op vakansie te gaan. Julle is vir die volgende uitgawe in die bekwame hande van ons assistent-redakteur, Raylentia Simmons, en dis sommer ’n lekkerleesuitgawe waarna julle kan uitsien. Tot volgende keer,