Smagklik & heilsaam

Dink net aan die aardse lekkerte van aartappels en patats: Smeltin-die-mond mashed potatoes, fluweelsagte sop, verleidelike braaiaartappels en nog meer. Heerlike hartskos!

AARTAPPELKERRIE

Genoeg vir 4

BESTANDDELE 3 eetlepels olie (olyf-, sonneblom- of canola-olie) 3 groot uie, grofweg gekap 3 knoffeltoontjies, gekneus en gekap 1 x 3 cm stuk vars gemmer, geskil en fyngekap of gerasper 1 rooi brandrissie, saadjies verwyder en fyngekap 8 groot aartappels, geskil en in groterige blokkies gesny 1 eetlepel matige kerriepoeier 1 koppie hoender- of groente-aftreksel ½ koppie klappermelk 1 eetlepel tamatiepasta Gerasperde skil van 1 suurlemoen Sout en varsgemaalde swartpeper na smaak 3 eetlepels varsgekapte koljanderblare

METODE Verhit die olie in ’n swaarboomkastrol oor matige hitte en braai die uie daarin tot goud en deurskynend. Voeg die knoffel, gemmer en brandrissie by en braai saam vir so ’n minuut of twee voordat jy die aartappelblokkies byvoeg. Verlaag die hitte, bedek die pot en laat vir ongeveer 10 minute so smoor. (As jy bang is vir aanbrand, kan jy ’n klein bietjie van die aftreksel nou al byvoeg. Sommige potte is mos haastiger as ander.) Voeg die kerriepoeier by en roer goed deur. Roer die tamatiepasta by die aftreksel en giet dit saam met die klappermelk in die pot. Voeg die suurlemoenskil en koljanderblare by en geur met sout en peper. Laat vir ongeveer 15 – 20 minute prut of totdat die aartappels gaar is en die sous begin dik word.