MINI AARTAPPEL-EN-SPEK-FRITTATAS

Lewer 12

BESTANDDELE

Vir die uie-marmelade

2 eetlepels olie (olyf-, sonneblom- of canola-olie) 3 rooiuie, in skyfies gesny 2 eetlepels Worcestershiresous 1 eetlepel sagte bruinsuiker

Vir die mini frittatas

2 groot aartappels, geskil en in klein blokkies gesny 6 repies swoerdlose strepiespek, fyngekap 6 eiers ¼ koppie melk ½ koppie gerasperde parmesaankaas ¼ koppie gekapte chives (grasuie) Sout en swartpeper na smaak Ekstra parmesaankaas

METODE

Vir die marmelade:

Verhit die olie in ’n middelslag kastrol en plaas die uie en Worcestershiresous daarin. Kook onbedek oor lae hitte vir 20 minute. Voeg die bruinsuiker by en kook vir nog 10 minute saam. Laat heeltemal afkoel.

Maak nou die frittatas:

Kook die aartappelblokkies vir 5 – 7 minute of tot net-net gaar. Dreineer en laat afkoel. Braai die spek oor matige hitte vir ongeveer 5 minute sodat dit mooi verkleur. Dreineer die spek op handdoekpapier. Klits die eiers, melk en sout en peper saam in ’n kleinerige bak. Smeer ’n 12-plaat muffinpannetjie. Verdeel die aartappels tussen die 12 gaatjies, asook die spek, parmesaankaas en chives. Meng die hopies in elke gaatjie. Giet die eier-en-melkmengsel in bo-oor elke hopie en maak dit mooi gelyk. Bak in ’n voorverhitte oond van 180°C vir 15 minute. Haal die pannetjie uit en voorverhit die oondrooster. Sprinkel ’n bietjie ekstra parmesaankaas op elke frittata en plaas vir ’n paar minute onder die oondrooster om dit mooi kleur te gee. Bedien die frittatas dit teen kamertemperatuur met ’n skeppie uiemarmelade op elk. Dis ideaal vir ’n ligte ete, as snoephappie vir die kosblik of as ’n southappie vir ’n partytjie of onthaal.

WENK: Jy kan ook gewone uie vir die marmelade gebruik. Dit sal nie so ’n groot verskil maak as jy nie rooiuie in die hande kan kry nie.