Klop die winter-blues
Die winter-blues kan jou depressief, en terneergedruk laat voel. Hier is ’n paar wenke om die gevoel te klop en jou gemoed, liggaam, hart en siel dié winter ligter te laat voel.
Winterdepressie kan beskryf word as daardie neerdrukkende gevoel wat sommige mense elke jaar gedurende die winter ervaar. Die koue, nat en grys weer dwing baie mense om binnenshuis te bly. Die dae is ook korter en donkerder. Sosiale aktiwiteite is gewoonlik dun gesaai en dit veroorsaak dikwels dat diegene wat aan winterdepressie ly, meer as gewoonlik begin dink aan daardie goed wat hulle nie juis gelukkig maak nie.
As gevolg van die tekort aan sonlig, verval jy in daardie grys en donker gat, jy voel depressief, moeg, angstig, is nie goeie geselskap nie en jy het minder beheer oor jou eetgewoontes. Die gepeusel aan ongesonder happies kan lei tot ’n toename in jou gewig. Baie lyers voel ook meer depressief in die oggend as saans.
Die grys weer in die winter gaan dikwels gepaard met sterk of stormagtige wind wat aan jou deure en vensters ruk en pluk en jou meer koud laat voel. Dit veroorsaak dat die vooruitsig om dit buite te waag, nie iets is waarna jy uitsien nie.
Die reën se lang trane wat buite teen jou venster afloop, is vir baie ’n bron van inspirasie, maar vir diegene wat aan winterdepressie ly, is dit iets wat die hart en gemoed netso grys maak. Winterdepressie kan volwassenes, bejaardes, tieners sowel as jong kinders raak.
’n vroliker winter
Dit is moontlik om ’n warmer en vroliker winter te beleef. Deur planne te beraam voor die winter aanbreek, kan help dat jou winterdepressie jou nie pootjie nie.
’n Gereelde oefenplan, byvoorbeeld om elke dag vir sowat 30 minute te gaan stap, kan wondere verrig om daardie neerdrukkende gevoel te verlig. Dit is ook belangrik om tyd te maak om te ontspan en om jouself te bederf.
Maak tyd om saam met vriende of familie te kuier, maar waak daarteen om nie te veel alkohol te gebruik nie. Dink positief, lees inspirerende boeke en maak meditasie ’n gereelde aktiwiteit.
As jy nie so gelukkig is om ’n kaggelvuur te hê nie, moet jy ander maniere probeer om warmer te bly. Sorg dat jy genoeg warm klere, skoene en beddegoed het.
Trek gordyne bedags oop om te sorg dat daar genoeg lig van buite af inkom. Dit sal help om daardie ergste neerdrukkendheid as gevolg van die nat, koue en donker weer te verlig.