Proe jou erfenis met dié tradisionele geregte
’n Herinnering uit my kleintyd kom op: Ouma wat voor die lang, houttafel by die houtstoof gesit en wag om te proe aan die erfeniskos wat in die potte prut. Dis daardie kos wat nou nog oor geslagte heen gedeel word.
TAMATIEBREDIE
Genoeg vir 6
BESTANDDELE
2 groterige uie, gekap ½ koppie water 2 ml swartpeperkorrels 2 ml cloves (naeltjies), fyngemaal 3 eetlepels olyfolie 2 kaneelstokkies 1 kg stowelamsvleis ’n Knoets gemmer van so ongeveer 3cm, geskil en fyngekap 1 groot knoffeltoontjie 3 steranysblommetjies 7 heel allspice (wonderpeperkorrels) 7 komynsaadjies 1 groen brandrissie 2 blikke Italiaanse tamaties 6 aartappels, geskil en in kwarte gesny 1 lemoen, in kwarte gesny
METODE
Gooi die uie en die water in ’n swaarboomkastrol met ’n deksel wat stewig toemaak. Voeg die swartpeperkorrels en die cloves daarby en kook die water weg. Gooi nou die olie en die kaneelstokkies by en braai
tot die uie goudkleurig is. Voeg die vleis, gemmer, knoffel, steranys, allspice en komyn by. Maak die pot dig toe, verlaag die hitte en laat dit vir sowat ’n uur prut tot die vleis begin sag word. Voeg nou die brandrissie en tamatie by en laat vir 20 minute prut. Voeg die aartappels by en prut totdat die aartappels begin sag word. Rangskik die lemoenkwarte bo-op en laat baie stadig prut vir nog 45 minute tot 1 uur sodat die geure goed kan meng. Bedien met witrys.