Kry ’n troeteldier en leer jou kind verantwoordelikheid
Troeteldiere hou verskeie ontwikkelings- en emosionele voordele in vir kinders. Maar voor jy ’n diertjie aanskaf, maak eers seker jy weet waarvoor jy jou inlaat.
Dis iets spesiaal vir enige kind om met ’n troeteldier groot te word. Diere is dikwels kinders se heel eerste beste vriend, partner in crime en dit leer hulle ook van ’n vroeë ouderdom af hoe om empatie teenoor ander lewende dinge te hê.
Om troeteldiere te hê, help ook kinders met hul ontwikkeling en leer hulle al vroegdag verantwoordelikheid.
Hoewel troeteldiere talle emosionele en gesondheidsvoordele inhou, meen kenners dis ook goed vir die gemoed. En mense met diere is gewoonlik oor die algemeen baie meer gelukkiger, want troeteldiere se teenwoordigheid en onvoorwaardelike liefde is oorweldigend en laat jou goed voel.
Dus kan ’n spesiale band tussen kind en troeteldier verskeie fisieke, emosionele en sosiale voordele vir jou kind(ers) inhou.
Tracey Fourie van Tokai in die Kaap is ’n ma van twee en meen hul troeteldiere het beslis ’n goeie uitwerking op haar kinders se lewe gehad.
“Ons het ’n Dachshund (hond), hamster, kat en visse. En my dogter, Maya (12), wil met alle mag nou ook ’n pet snake hê, want sy is mal oor reptiele en het ’n regte obsessie en passie vir al daai grillerige goeters.
“Die hond het ons gekry toe Maya sewe jaar oud was en dit het haar baie gehelp, veral omdat sy altyd bang was vir honde. Toe ons die hond kry, was daar dadelik ’n verandering in haar houding jeens honde. Dit het ’n hengse verskil gemaak omdat sy nou glad nie meer bang is vir honde nie. Dis ook haar verantwoordelikheid om na die diere om te sien en hulle te versorg,”sê Tracey.
“Met haar was daar beslis ’n emosionele ommekeer, want veral honde is baie liefdevol. Dit het ook haar confidence ’n boost gegee. Die hond is haar verantwoordelikheid; sy speel met hom; hy slaap by haar op die bed en sy is nou baie lief vir enige diere.”
Tracey sê hulle oorweeg ook nou om
vir hul seun, Noah (7), sy eie hondjie te kry, want sy glo dit sal hom ook help met onder meer sy emosionele ontwikkeling.
“Ek sal dit beslis weer doen, want ek glo die benefits van troeteldiere outweigh beslis die cons.”
Troeteldiere hou nie net gesondheidsvoordele vir jou en jou gesin in nie, maar jy voel ook meer vry, geliefd en gelukkiger saam met jou dier; jy’s minder bang en jy kry beslis oefening veral met ’n hond wat elke dag wil gaan stap.
As daai stert so swaai of jy kry ’n leksoen, verminder dit veral angstigheid en bied dit ’n mate van vertroosting en emosionele veiligheid vir baie mense.
Die voordele
Klein kinders leer van jongs af daar is verskeie verantwoordelikhede en pligte daaraan verbonde om ’n troeteldier te hê:
Hulle leer hoe om vir iets wat lewe te sorg; om die dier en sy hok skoon te hou en hom gereeld te voed.
Hulle leer om te praat en nie te skreeu nie.
Hulle leer om empatie te hê en nie die dier, en uiteindelik ’n maatjie, af te knou nie.
Om geduldig te wees en nie die dier wakker te maak wanneer sy slaap nie. Respek te hê vir die dier. Verantwoordelikheid om na die dier om te sien en te beskerm.
Leer maatjies hoe om die dier te hanteer en mee te speel, asook meer van die dier self.
Omdat jy jou troeteldier as deel van die gesin beskou, moet sy ook só behandel word. Ouers moet die voorbeeld stel en die kinders leer hoe om na die dier om te sien en te versorg.
Afhangende of die baba of dier eerste deel van die gesin was, moet die dier veral stelselmatig aan die nuwe baba bekendgestel word. Só sal die dier, byvoorbeeld ’n hond, nie jaloers word en die baba wil seermaak nie.
Die baba aan die ander kant groei saam met die dier op en leer so met tyd liefde, empatie en omgee teenoor ander en hoe om die dier te versorg namate albei ouer word.
Volgens Jacqui Kaber, eienaar van George Pets & Aquatics op George in die Suid-Kaap, hou troeteldiere verskeie gesondheids- en emosionele voordele vir kinders in soos onvoorwaardelike liefde en verantwoordelikheid deur self die dier te versorg. Dit help ook die kind met sosiale ontwikkeling.
“Troeteldiere stimuleer ook ooraktiewe en gestremde kinders. Selfs net om ’n troeteldier te streel, kan jou emosies laat bedaar,”verduidelik sy.
Jacqui sê ouers moet eers gewoond raak aan die roetine met ’n nuwe baba voordat hulle daaraan dink om ’n troeteldier soos ’n hondjie aan te skaf.
“Nuwe ouers is so besig met hul nuwe baba en klein kinders dat hulle nie genoeg aandag aan ’n nuwe troeteldier ook sal kan gee nie,”meen sy.
voor jy ’n dier kry
Jacqui sê daar is verskeie faktore wat jy in gedagte moet hou wanneer jy ’n troeteldier wil aanskaf. Voornemende troeteldier-eienaars moet hulself dus eers die volgende afvra:
Kan ek die troeteldier bekostig? Dit sluit in: Kos, veeartskoste, tipe dier, grootte hok, versorging, ensovoorts.
Is die werf geskik vir ’n troeteldier? Is daar byvoorbeeld genoeg spasie in die agterplaas, huis, woonstel of op die stoep?
Is die werf heeltemal omhein en veilig vir die dier om vrylik rond te kan beweeg?
Jacqui sê die grootte en tipe dier hang af van die klant se behoeftes en dus hul keuse.
“Honde, hamsters, rotte, marmotte, katte en slange (meeste reptiele), vernaam onder die jonger seuntjies, is van die gewildste troeteldiere by ons klante hier.
“’n Huishondjie soos ’n Jack Russell is sekerlik die gewildste en geskikste troeteldier as jy klein kinders het. Hulle kry nie gou seer nie, spring nie kinders om nie, is nie byterig nie en raak baie gou geheg aan jong kinders.”
Sy sê verder kinders leer deur die voorbeeld wat hul ouers stel.“Kinders kan van jongs af met byna enige troeteldier oor die weg kom, mits die ouers hul goeie leiding gee oor hoe om die dier te hanteer en te versorg.”
oppas vir Allergieë
Jacqui stel voor dat ouers en kinders liewer ’n reptiel aanskaf as enige van die gesinslede ’n allergie het.
“Reptiele is geskik vir mense en kinders met allergieë. As jy regtig ’n troeteldier wil hê, is Yorkies ’n goeie keuse, want hulle is bekend vir hul mooi hare sonder ’n undercoat.
“Reptiele is ’n bietjie meer ingewikkeld om aan te hou. Jy moet die regte inligting en toerusting hê, sowel as die regte beligting voordat jy enigsins ’n reptiel kan aanhou. Jy moet ook verstaan wat hulle bron van voedsel is voordat jy ’n reptiel aanskaf,”sê Jacqui.
Sy meen ook dis wys om eers vooraf seker te maak dat geen gesinslid bang is vir ’n slang, akkedis of spinnekop nie.
Kinders kan van jongs af met byna enige troeteldier oor die weg kom, mits die ouers hul goeie leiding gee.