Dís hoe die gebruik van geld oor die jare ontwikkel het

Vandag gebruik ons note, munte, kaarte en selfs fone om items te koop, maar dit was nie altyd só nie. Kyk hoe het geld ontwikkel.

Voor die ontstaan van geld

Geld was nie altyd in gebruik vir die koop en verkoop van goedere nie. Geld of geldeenhede soos ons dit vandag ken, is sowat 4 000 jaar gelede ontwerp. Dit het vir die eerste keer in die vroeë 500 BC in gebruik gekom. Voor dié tyd is kooptransaksies beklink met die ruilhandelmetode. Ruilhandel was die uitruil van goedere vir ander goedere. Items wat in ruilhandel baie waardevol was, is sout, tee, tabak, graan en vee. Maar hierdie manier van sake doen, het uitdagings gebied omdat vee kon siek raak of vrek en oeste kon vergaan. Ruilhandel was om hierdie redes nie ’n praktiese en langdurige manier van besigheid dryf nie.