TUISGEMAAKTE AARBEI-SWEETIE PIES
Genoeg vir 4 BESTANDDELE
3 groot eierwitte, teen kamertemperatuur 270 ml strooisuiker 180 ml vloeibare glukose (beskikbaar by bakwinkels) 80 ml water 5 ml aarbei-geursel ’n Paar druppeltjies pienk kleursel 4 Marie Biscuits of stroopwafels 100 g melksjokolade, gesmelt ’n Knippie eetbare glitter (opsioneel)
METODE
Klits die eierwitte tot lig en skuimerig. Voeg 2 eetlepels van die strooisuiker by en klits tot sagte punte vorm. Hou eenkant. Verhit die res van die suiker, glukose en die water in ’n potjie en bring tot kookpunt. (As jy ’n suikertermometer het, gebruik dit om die temperatuur te monitor.) Sodra die mengsel kook, verlaag die hitte effens sodat dit nie oorkook nie. Kook die mengsel totdat dit 115°C bereik. Indien dit lyk asof die mengsel wil oorkook, haal dit vir ’n wyle van die stoof af net totdat die borrels sak. Sodra die mengsel 115°C (sagtebal stadium) bereik, skakel weer jou menger aan op die laagste spoed. Indien jy nie ’n suikertermometer het nie, toets dit op die volgende manier: Drup ’n klein hoeveelheid van die stroop in ’n glas koue water. Dit sal ’n sagte bal vorm. As jy die balletjie in jou handpalm hou, sal dit vanself so plat soos ’n pannekoek raak. Verwyder die stroop van die stoof. Voeg die stroop stadig in ’n dun straaltjie by die eiermengsel. (Wees versigtig want die stroop brand baie seer.) Sodra al die stroop bygevoeg is, verhoog die spoed en klits vir 6 – 8 minute. Voeg nou die geursel en kleursel by en klits vir ’n verdere 2 – 4 minute totdat die mengsel soos die binnekant van ’n sweetie pie lyk. Jou fluff is nou klaar. Skep ’n paar lepelsvol in ’n spuitsak en spuit op die Marie Biscuits soos jy versiersel op ’n cupcake sal spuit. Verkoel vir paar minute en bedruip met die gesmelte sjokolade. Verkoel weer totdat die sjokolade gestol is. Sprinkel met eetbare glitter. Die oorblywende“fluff”(indien die kinders nie alles dadelik opeet nie), kan in ’n glasfles of verseëlbare plastiekbak in die yskas gebêre word vir ten minste 1 week.