KONSERTINAKRUIEBROOD
Lewer ’n standaard-grootte brood
BESTANDDELE
4 koppies koekmeel 1 pakkie yeast (kitsgis) 1 teelepel suiker 1½ teelepels sout 1½ koppies warm water 2 eetlepels vars pietersielie, gekap 2 eetlepels chives (grasuie), gekap 1 eetlepel vars tiemieblaartjies 2/3 koppie cheddarkaas, gerasper ’n Bietjie melk vir glans
METODE
Sif die meel, suiker en sout saam in ’n groot mengbak. Voeg die yeast by en maak ’n gaatjie in die middel van die droë bestanddele. Giet die water in die gaatjie en meng met die droë bestanddele tot jy ’n lekker sagte deeg kry. Haal die deeg uit en knie vir minstens 10 minute op ’n meelbestrooide oppervlak totdat jy ’n lekker gladde en elastiese deeg het. Plaas die deeg in ’n skoon bak wat liggies met olie gesmeer is. Bedek met kleefplastiek en laat staan vir 1 uur op ’n warm plek tot die deeg dubbel sy grootte gerys het. Knie dit af en verdeel die deeg in die helfte en elkeen op sy beurt weer in tien. Rol elke stukkie uit totdat jy 20 ronde deegskywe van ongeveer 6 cm in deursnee het. Meng die vars kruie met die kaas en skep 2 teelepels daarvan op ’n skyfie en bedek met ’n ander skyfie. Herhaal totdat jy 10 sulke“toebroodjie”-skyfies het. Pak die skyfies in ’n gesmeerde standaardgrootte broodpan teenaan mekaar sodat hulle op hul dun kante staan en die eind-resultaat soos ’n konsertina lyk. (Moenie bekommerd wees nie – hulle pas wel baie styf op mekaar.) Bedek met ’n klam doek en laat vir 30 minute op ’n warm plek staan. Verf ’n bietjie melk bo-op en bak vir 30 minute in ’n voorverhitte oond van 210°C.