FRANSE VARKBREDIE (CASSOULET)
Genoeg vir 4 – 6 Hierdie is ’n stadige pot en dit verg ’n bietjie meer moeite en geduld, maar dis oor en oor die moeite werd. Dis die koning van alle bredies en ’n gesogte dis in Frankryk.
BESTANDDELE
500 g wit nierbone, oornag geweek 2 uie 4 naeltjies 1 wortel, geskraap en in die helfte gesny 4 bay leaves (lourierblare) 4 tiemietakkies 4 knoffeltoontjies 500 g ontbeende pork belly, vel verwyder (hou die vel vir ’n lekker ertjiesop) 500 g stowelamsvleis 4 hoenderboudjies 8 mini-varkworsies (chipolatas of 4 gewone groot varkworsies) 3 eetlepels olie 1 selderystingel, in stukkie gekap 5 songedroogde tamaties in vinaigrette (gedreineer) 1 x 410 g blik geskilde en gekapte tamaties 150 ml droë witwyn Sout en varsgemaalde swartpeper na smaak 1 koppie vars broodkrummels
METODE
Dreineer die bone en gooi dit in ’n groot kastrol. (Die bone moet die kastrol net half vol maak.) Halveer een van die uie en druk ’n naeltjie in elke helfte. Plaas dit saam met die bone in die kastrol. Voeg die twee wortelhelftes, 2 bay leaves, 2 tiemietakkies en 2 heel knoffeltoontjies by. Sny die pork belly in happie-grootte stukke en plaas ook in die kastrol. Bedek alles met genoeg koue water en bring tot kookpunt. Skep die wit skuim af, verlaag die hitte, bedek die pot en kook vir 1 uur en 20 minute. Terwyl die bonepot aan die kook is, verhit die olie in ’n lekker groot oondroosterpan op die stoofplaat en verbruin die stowelamsvleis, hoenderboudjies en worsies in sarsies. Plaas al die vleis terug in die oondroosterpan. Kap die oorblywende ui fyn en voeg saam met die seldery, songedroogde tamaties, blik tamaties met hul sap, wyn en die oorblywende tiemietakkies, knoffel en bay leaves by. Geur met sout en peper. Bedek die pan met foelie en plaas in ’n voorverhitte oond van 160°C vir 1½ uur. Wanneer jou bonepot en oondpan beide gereed is, dreineer die bonemengsel en hou 300 ml van die bonewater terug. Neem ’n groot oondvaste bak en skep ’n laag van die bonepot onderin, gevolg deur ’n laag van die oondroosterpanmengsel. Herhaal tot jy altwee mengsels opgebruik het. Giet die bonewater wat jy eenkant gehou het, bo-oor. Sprinkel die broodkrummels bo-oor en bedruip liggies met ’n bietjie olie. Bedek die skottel en bak vir 1½ uur in ’n voorverhitte oond van 180°C.
WENK: Jy kan 5 groot vars, geskilde tamaties in die plek van die blik tamaties gebruik. En 1 eetlepel tamatiepasta in die plek van die songedroogde tamaties.