Wenke wat werk
Hier is raad vir jou kunstande, lae bloeddruk en sooibrand, én handige wenke met aartappel.
Verf houtwasgoedpennetjies in helder kleure en plak dit met sterk gom aan die binnekant van jou klerekasdeure vas. Dan kan jy jou serpe, ens. daaraan vaspen. Jy kan dit ook in die badkamer vasplak en die hele gesin se waslappe daarop hang.
HESTER ABDINOR, KLERKSDORP
Vuurhoutjies kan jou ’n mooi smokey eye gee. Steek ’n vuurhoutjie aan, blaas die vlam dood en laat dit afkoel. Die charcoal maak ’n uitstekende eyeliner en sorg vir daai smokey look.
JANET GOVINDEN, STELLENBOSCH
Vir moegheid en ’n gebrek aan energie: Meng 1 koppie brandewyn en 1 bottel elk Balsem Kopiva (rooi), Witdulsies, Hoffmansdruppels, Versterkdruppels, Wonderkroonessens, Rooilaventel en Sal Volatile (dieselfde grootte as die Lennon-botteltjies). Meng 1 teelepel van die mengsel in ’n wynglas vol water en gebruik 3 maal per dag. Dis baie goed om te gebruik ná siekte.
JOSIE POLLA, KRAAIFONTEIN
As jy gaste kry en jou avokadopeer is nog hard, draai dit toe in foelie en bak vir 10 minute in die oond. Sit dan in die yskas vir nog 10 minute tot koud en gebruik.
RIA DE JAGER
Om knoffel maklik af te skil, gooi dit vir 5 minute in koue water, dan sal die skille afdop.
FRANCIS DREYER, NELSPRUIT
Baie van ons het oogskadu-poeier wat ons nie gebruik nie. Maak jou eie nail polish met 1 botteltjie top coat en ’n houertjie oogskadu-poeier. Voeg saam en skud goed.
AULBANY DYERS, SOMERSET-WES
Voeg 1 tot 2 eetlepels vars, fyn broodkrummels by jou eiers as jy scrambled eggs maak. Dit vermeerder die hoeveelheid en gee dit ’n aangename smaak.
ELLA LUDICK, KOMAGGAS
Moenie jou pampoenskille weggooi nie. Was dit goed af en sny in blokkies. Voeg aartappels en swartpeper by en kook. Dis ’n heerlike bredie net so.
TROY VAN WYK, WILLISTON
Iets interessant vir mashed potatoes: Meng dit met gemengde groente en sprinkel ’n bietjie cheddarkaas bo-oor.
ELRINA DE BEER, VAALPARK
As jou kar se radiator ’n klein lekkasie het, gooi borrie of ’n bietjie mieliemeel daarin. Dit stop die lekkasie.
DESMOND SPRINKAAN, WESBANK
As jy nie room het nie, klits 1 piesang en 1 eierwit saam. Dit smaak nes room; niemand sal die verskil agterkom nie.
LIZ THIART, GORDONSBAAI
Maak jou eie drupmatjies deur vilt aan die onderkant van mooi teëls vas te plak.
LORRAINE MEYER, GRASSY PARK
Moenie jou ou skuurdraad vir potte weggooi nie. Maak dit vas onder jou plat mop; dit haal al die hardnekkige merke van die vloer af. C. PRETORIUS, ALBERTINIA