PAASMANDJIES
Lewer ongeveer 6 hasies met mandjies
BESTANDDELE
Vir die hasies en sirkels 3 koppies koekmeel ½ teelepel bakpoeier ½ teelepel sout 250 g sagte botter 1 koppie suiker 1 teelepel vanilla essence ¼ teelepel amandelgeursel (opsioneel) 1 eier plus 1 eiergeel ¼ koppie melk Vir die kolwyntjie mandjies 1 koppie bruismeel 125 g botter 2 eiers ’n Knippie sout 1 teelepel vanilla essence 1 teelepel bakpoeier 4 eetlepels melk 12 blinkrooi foeliehouertjies (of wat jy ook al as jou kleurskema kies) Vir die versiersel 1 eierwit 2 teelepels koue water 1 koppie versiersuiker ½ teelepel vanilla essence ’n Paar druppels rooi voedselkleursel Vir die samestelling Eetbare blinkrooi sprinkelstof Speckled eggs 1 pakkie rooi plastiek versiersel 1 pakkie wit plastiek versiersel Rooi versiersuiker blommetjies
METODE
Koekiedeeg: Sif die meel, bakpoeier en sout saam en hou eenkant. Klits die botter, suiker, vanilla essence en amandelgeursel saam tot romerig. Voeg die eier en eiergeel by en klits tot net-net gemeng. Roer die droë bestanddele en melk by tot jy ’n sagte deeg het. Draai die deeg in kleefplastiek toe en laat 30 minute in die yskas rus. Rol die deeg uit en druk 6 hasievorms en 6 sirkels uit. (Die sirkels moet groot genoeg wees sodat ’n kolwyntjiehouer en hasie regop daarop kan staan.) Plaas op ’n bakplaat wat met bakpapier gevoer is en bak vir 15 minute in ’n voorverhitte oond van 180°C. Kolwyntjies: Klits al die bestanddele vir die kolwyntjies saam met ’n elektriese klit- ser en skep in ’n 12 gat-kolwyntjiepan wat met die foeliehouertjies gevoer is. Bak vir 2 minute in ’n voorverhitte oond van 180°C.
Mandjies en vorms: Rol die wit en rooi plastiekversiersel afsonderlik tussen twee lae kleefplastiek uit en druk 6 hasievorms en 6 sirkels uit om op jou koekievorms te pas. Rol 6 dun stringe uit en buig elkeen in die vorm van ’n handvatsel. Rol nog 6 stringe uit en vorm sirkels so groot soos die omtrek van jou mandjie (kolwyntjie). Sodra die hasie- en sirkelkoekies uit die oond kom en nog warm is, plaas die plastiekvorms wat jy uitgedruk het, bo-op. (As jy vergeet het en die koekies reeds afgekoel het, kan jy van die versiersel gebruik om dit te laat vassit.) Laat die mandjiehandvatsels en -sirkels staan om hard te word.
Versiersel: Klits die eierwit en voeg dan die res van die bestanddele by. Klits goed. Skep ’n bietjie van die versiersel op elke kolwyntjie. Plaas ’n sirkel bo-op om die rand van die mandjie te vorm. Druk die handvatsel vas en maak dit staan – die sirkel sal help om dit te stut. Pak die eiertjies terwyl die versiersel nog klam is. Plak blommetjies met die versiersel op die rand van die mandjie by die handvatsel vas. Versier met blinkrooi sprinkelstof. Gebruik die versiersel om die mandjie op die koekiesirkel staan te maak. Laat ’n bietjie plek agter die mandjie om die hasie staan te maak. Plak ’n blommetjie op die hasie se koppie, skuins by sy oor vas en gebruik versiersel om die hasie agter die mandjie staan te maak.
Probeer dié soetding in plaas van die gewone Paaseiers. Die kinders kan ook hand bysit. Deur Karen Hart