VARKFRIKKIESLAAI MET PYNAPPEL
Genoeg vir 6
BESTANDDELE Vir die frikkadelle
1 x 200 g pak strepiesspek (streaky bacon), in stukkies gesny 1 x 500 g verpakte piekniekham (dis in die winkelyskaste saam met die polonierolle) 500 g varkmince 2 eiers 1 koppie vars broodkrummels 2 eetlepels bruinsuiker 2 teelepels mosterdpoeier Sout en varsgemaalde swartpeper na smaak 2 eetlepels pynappelsap
Vir die glanssous
1 koppie pynappelsap ½ koppie appelasyn ½ koppie bruinsuiker 1 eetlepel tamatiesous 2 teelepels mosterdpoeier ½ teelepel rooipeper 1 teelepel maizena (mielieblom), gemeng met 2 eetlepels koue water
Vir die slaai
Slaaiblare van jou keuse 1 komkommer, in skyfies gesny 1 pynappels, geskil, stronk verwyder en in stukkies gesny 10 – 12 dwergtamaties (rosa of kersie), gehalveer
Vir die slaaisous
1 eetlepel Dijon-mosterd 1 eetlepel heuning 3 eetlepels appelasyn 6 eetlepels olie (sonneblom, canola- of olyfolie) Sout en varsgemaalde swartpeper na smaak
METODE
Frikkadelle: Maak die spek en ham saam fyn in ’n voedselverwerker. Sorg dat dit net-net fyngekap is – moenie ’n puree daarvan maak nie. Plaas dan dié mengsel saam met die res van die bestanddele vir die frikkadelle in ’n mengbak en meng goed met jou hande. Vorm frikkadelle ongeveer so groot soos tafeltennisballetjies en pak dit op ’n bakplaat wat liggies met olie gesmeer is. Plaas in ’n voorverhitte oond van 180°C vir 20 – 30 minute of tot die frikkadelle gaar is.
Glanssous: Meng al die bestanddele, behalwe die maizena, in ’n kastrol en bring tot kookpunt. Klits die maizena-en-watermengsel by en laat vir ’n minuut of twee prut. Dompel die frikkadelle in die sous sodra dit uit die oond kom en laat staan in die sous om heeltemal af te koel.
Slaai: Rangskik die slaaiblare in ’n groot slaaibak en meng met die res van die slaaibestanddele.
Slaaisous: Klits al die bestanddele vir die slaaisous saam en giet oor die slaai. Rangskik die frikkadelle bo-op en bedien met heerlike, varsgebakte growwebrood. WENK: Jy kan die frikkadelle ook in ’n pan op die stoof gaarmaak.