FRIKKADELLE IN SOUS

Genoeg vir 6 BESTANDDELE

1 kg mince 2 middelslag uie, fyngekap 1 eetlepel varsgekapte pietersielie 1 teelepel varsgekapte tiemie (of ½ teelepel droë tiemie) Sout en varsgemaalde swartpeper na smaak 2 eetlepels botter 2 eetlepels olie 1 kleinerige aartappel, geskil en fyngekap 1 x 3 cm stuk vars gemmer, geskil en fyngekap 1 teelepel fyn komyn 1 teelepel fyn koljander ½ teelepel suiker ½ teelepel rissiepoeier 1 eetlepel witasyn ¼ teelepel borrie ¾ koppie water 1 eetlepel varsgekapte koljanderblare

METODE

Meng die mince, die helfte van die uie, asook pietersielie en tiemie in ’n mengbak en geur met sout en peper na smaak. Gebruik jou hande om dit deeglik te meng en frikkies so groot soos tafeltennisballetjies te vorm. Verhit die botter en olie in ’n swaarboompan en braai die frikkies in sarsies tot alkant bruin. Skep die frikkies met ’n gaatjieslepel uit die pan en hou eenkant. Gebruik dieselfde pan (indien nodig, kan jy nog ’n bietjie botter en olie byvoeg) en braai die ander helfte van die uie en die aartappel saam totdat die uie sag en deurskynend is en die aartappel byna sag. Voeg die gemmer by en braai vir ’n paar minute saam met die uie-en-aartappelmengsel. Roer die komyn, koljander, suiker en rissiepoeier by en geur met sout en peper na smaak. Roerbraai vir ongeveer 5 minute. Voeg die asyn, borrie en water by en meng goed. Verlaag die hitte en laat prut. Rol die frikkies in die pansous. Roer die vars koljanderblare deur. Bedek die pan en laat vir 15 minute prut. Skep die frikkies en die sous saam in ’n opdienskottel.