UIESOP MET KAASBROODJIES
Genoeg vir 4
BESTANDDELE
Vir die sop 4 eetlepels olie 8 groot uie, fyngekap 1 eetlepel korreltjiemosterd 1 teelepel Marmite 6 – 8 koppies groente- of hoenderaftreksel ’n Handvol varsgekapte pietersielie Sout en varsgemaalde swartpeper Vir die kaasbroodjies ’n Paar snye brood Genoeg cheddar- en parmesaankaas Genoeg botter
METODE
Sop: Verhit die olie in ’n groot kastrol en braai die uie daarin totdat dit begin sag word en verkleur. Moenie dit laat bruin braai of aanbrand nie. Roer die korreltjiemosterd en die Marmite deur en giet die aftreksel by. Bring die pot tot kookpunt, verlaag die hitte en laat vir 20 – 30 minute prut. Gebruik ’n handmenger of voedselverwerker om die sop te verpulp totdat dit ’n fluweelsagte tekstuur het. Geur met sout en peper. As die sop te dik na jou smaak is, kan jy nog ’n bietjie aftreksel byvoeg. Plaas die pot terug op die stoof en roer die pietersielie deur. Maak deurwarm en laat prut nog vir ongeveer 5 minute. Kaasbroodjies: Gebruik ’n koekiedrukker en druk elke sny brood in ’n mooi ronde sirkel uit. Rasper ’n bietjie cheddar- en parmesaankaas (of net cheddar) en meng met ’n bietjie botter. Smeer elke sirkel met die botterkaasmengsel en rooster onder ’n voorverhitte oondrooster. Hou fyn dop dat dit nie skroei of brand nie – dit gaan baie vinnig.