HOOFKOS: Die Weskus se winterkos sal jou mond laat water
Net soos die natuurskoon van die Weskus jou hart sal steel, sal dié streek se gunstelingresepte jou siel én lyf voed!
OONDGEROOSTERDE SNOEK MET GEBAKTE PATATS
Genoeg vir 10 – 12
BESTANDDELE
1 hele snoek (of ’n halwe groot snoek) 6 medium-grootte patats, afgespoel Skeut olyfolie ½ koppie botter, gesmelt 2 eetlepels knoffel, gerasper 1 eetlepel pietersielie, fyngekap ¼ koppie appelkooskonfyt, gesmelt 2 – 3 eetlepels Ina Paarman Fish Spice 1 suurlemoen se sap en skil gerasper Sout en vars gemaalde swartpeper Knippie sout
METODE
Plaas die patats op ’n oondplaat, geur en bedruip liggies met olyfolie. Bedek met foelie en bak saam met snoek in ’n voorverhitte oond teen 180°C. Bak die patats ’n bietjie langer tot sag en gaar. Toets dit met ’n tandestokkie; dit moet dwarsdeur kan steek. Meng die botter, knoffel, appelkooskonfyt en pietersielie en smeer mildelik oor die vis. Sprinkel nou met die fish spice en bak by 180°C vir 20 – 30 minute. Bedruip met vars suurlemoensap en gerasperde suurlemoenskil sodra dit uit die oond kom. Bedien warm met die oondgeroosterde patats en sterk koffie.
TAMATIEBREDIE
Genoeg vir 4 – 6
BESTANDDELE
600 g stowe lamsvleis 600 g ryp tamaties, grofgekap 2 uie, in ringe gesny 2 eetlepels olyfolie 3 stukke pypkaneel 1 – 2 eetlepels suiker 2 teelepels sout 1 blokkie hoenderaftreksel, opgelos in 2 koppies kookwater 4 aartappels, in kwarte gesny Peper na smaak
METODE
Braai die uie in die olyfolie. Voeg die vleis en kaneel by en braai tot lekker bruin. Voeg die tamaties, suiker, sout en hoenderaftreksel by. Prut oor lae hitte totdat die vleis sag is. Voeg die aartappels en bietjie peper by en prut bedek totdat die aartappels lekker sag is. Die sous moet lekker dik wees. Voeg nog suiker en sout na smaak by indien nodig. Bedien met gestoomde witrys. Wenk: Jy kan die vars tamaties met 2 blikke gekapte tamaties vervang.
GEVULDE ONTBYTVETKOEKIES
Lewer12 –15 vetkoekies
BESTANDDELE
2 koppies bruismeel 1 teelepel bakpoeier ½ teelepel sout 2 eiers ½ koppie water 4 viennas, in kwarte gesny Genoeg olie vir vlakbraai Konfyt of stroop vir opdiening
METODE
Meng die bruismeel, bakpoeier en sout saam in ’n mengbak. Klits die 2 eiers en die koppie water liggies by. Voeg die viennas by die vetkoek-beslag. Skep lepelsvol beslag, elk met ’n stukkie worsie, en vlakbraai tot goudbruin, draai om en braai aan die ander kant ook tot gaar. Skep uit en dreineer op kombuispapier. Indien daar nog beslag oor is nadat al die worsies gebruik is, bak lepelsvol van die oorblywende beslag. Bedien warm, en saam met stroop en konfyt vir die vetkoekies sonder die worsies.
SNOEK-BREYANI
Genoeg vir 6 – 8
BESTANDDELE
8 – 10 stukkies snoek 2 eetlepels sonneblomolie 2 eetlepels matige kerriepoeier 1 teelepel paprika ½ teelepel rissiepoeier Olie vir vlakbraai 2 koppies witrys 1 teelepel sout ½ teelepel borrie 1 eetlepel botter 2 uie, in dun ringetjies gesny 1 teelepel knoffel, gerasper 100 g gevriesde gemengde groente 2 eetlepels pietersielie, gekap
METODE
Meng die 2 eetlepels olie, kerriepoeier, paprika en rissiepoeier tot ’n pasta en vryf die visstukkies daarmee in. Kook die rys, sout en borrie in genoeg water, tot gaar. Dreineer en spoel af met koue water. Hou eenkant. Verhit die olie vir vlakbraai oor matige hitte in ’n pan. Bak die vis in die olie tot gaar. Skep uit en hou eenkant. Gooi die oortollige olie af en smelt die botter in dieselfde pan. Braai die uie en knoffel oor lae hitte tot gekarameliseerd. Voeg groente en skeutjie water by, bedek en prut vir 2 – 3 minute. Roer nou die rys hierby en meng deur. Pak die gaar vis bo-op die rys, meng deur en garneer met pietersielie. Laat staan vir 10 – 15 minute vir die geure om goed te ontwikkel.
ROMERIGE SWARTMOSSELSOP
Genoeg vir 6 – 8
BESTANDDELE
800 g swart halfskulpmossels 2 eetlepels olyfolie 2 eetlepels gesoute botter (soos Lurpak) 1 ui, fyn gekap 1 wortel, grof gerasper 1 bol vinkel, dun gesny (opsioneel) 2 knoffelhuisies, gerasper ¼ teelepel crushed chillies 2 eetlepels koekmeel ¼ koppie witwyn (opsioneel) 2 blokkies vis- of groente-aftreksel, opgelos in 4 koppies kookwater 1 koppie room Sout en varsgemaalde swartpeper na smaak Vinkeltakkies vir garnering Franse brood vir opdiening
METODE
Smelt die olyfolie en botter in ’n pot. Braai die ui, wortel, vinkel, knoffel en crushed chillies in die olie en botter tot sag maar nie bruin nie. Voeg die koekmeel by en roer vir sowat ’n minuut.Voeg nou die witwyn en aftreksel by en roer deur. Voeg die mossels by, bedek en prut vir so 5 – 10 minute. Voeg die room by en geur met sout en peper soos verkies. Garneer met vinkeltakkies en bedien warm met stukke Franse brood.