Vra Dr. Genine Soek jy raad oor ’n mediese probleem?
Pynlike oorinfeksie
Vraag VLOEISTOF LOOP UIT OOR Ek soek hulp vir my pynlike ore. Daar loop ’n deursigtige vloeistof uit. Dit affekteer nou ook die buitekant van my oor. Finansieel kan ek nie ’n dokter bekostig nie. Enige advies met dié probleem sal waardeer word. RAADOP My oor loop nou al vir jare uit en dit stink vreeslik. Ek was al by ’n dokter, maar die pille help nie. Ek is nou al raadop met hierdie oorprobleem. MOEDELOOS Antwoord BESTE RAADOP & MOEDELOOS Die oor bestaan uit drie dele: 1. Buitenste oor/oorkanaal: Dit is die sigbare deel van die oor en bestaan uit die uitwendige oorkanaal wat in die oordrom/trommelvlies eindig. 2. Die middeloor bevat drie gehoorbeentjies, twee spiersenings en twee senuweebondels. Die Eustachiusbuis verbind die middeloor met die agterkant van die keel en sorg dat die drukking tussen die middeloor en agterkant van die keel gelyk is. 3. Die binneoor bestaan uit die gehoororgaan en die balans-orgaan. Die oorskulp vang klank op en lei dit deur die oorkanaal na die trommelvlies wat vibreer en die klank verplaas na die drie gehoorbeentjies in die middeloor. In die binneoor ontleed die gehoor-orgaan die klank en stuur die inligting met die gehoorsenuwee na die brein. Enige afskeiding of vog wat uit die oor kom, staan bekend as OTORREE. Dit kan deuskynend wees of bloederig, etterig, of selfs wit, geel, bruin of swart oorwas. Otorree kan van die buitenste of middeloor kom. BUITENSTE OOR-OTORREE: Die oorsake kan wees: Infeksie (akuut of chronies) of as gevolg van ekseem of psoriase in die oorkanaal. Wanneer ’n klein abses in die oorkanaal vorm en dan bars, kan dit etterige vog afgee. Akute infeksie het baie pyn, maar chroniese infeksie is gewoonlik pynloos en affekteer albei ore. Jou dokter moet jou ore ondersoek om ’n diagnose te bevestig. Behandeling is die skoonmaak van die buitenste oor en antibiotika-oordruppels of -medikasie. Met ekseem kan ’n matige steroïederoom gebruik word. MIDDELOOROTORREE: Akute middeloor-infeksie lei tot erge pyn. Die oordrom kan bars om die vog in die middeloor uit te laat, wat die pyn kan verlig. Die gaatjie kan vanself toegroei, maar as dit oopbly, kan dit lei tot 'n gereelde mukus-afskeiding wat sleg ruik as dit nie skoongemaak word nie. Jou huisdokter of kliniekverpleegkundige kan dit behandel en na ’n oor-neus-en-keel
spesialis (ONK) verwys, wat sal aanbeveel of jy ’n operasie moet ondergaan om die gaatjie in die oordrom te herstel. CHOLESTEATOOM: Dit is ’n abnormale velgroeisel in die middeloor, agter die oordrom/trommelvlies. Herhaaldelike middeloor-infeksies, ’n skeur (of gaatjie) in die oordrom, of negatiewe druk in die middeloor wat ’n sist (sakkie) in die middeloor vorm, laat velselletjies in die middeloor ingaan. Soos velselletjies in die res van die liggaam, groei die selletjies en word dooie selletjies gestort. Omdat die middeloor klein is en die dooie velselletjies nie kan uitkom nie, bou dit op en vergroot die velgroeisel. Die groeisel beskadig die oordrom, asook die beentjies in die middeloor, wat gehoorverlies veroorsaak. Oorinfeksie is baie algemeen met cholesteatoom en kan ’n stink afskeiding veroorsaak wat bloederig kan wees. ’n ONK-spesialis moet cholesteatoom diagnoseer. ’n Operasie is nodig om ’n cholesteatoom te verwyder en die gehoor te herstel. ’n Infeksie moet ook eers met antibiotika behandel en die oor skoongemaak word. Risiko’s van ’n operasie sluit in gehoorverlies, duiseligheid en geraas in die oor (tinnitus), gesigsverlamming, en die vermoë om te proe kan aangetas word. Jy moet gereeld jou ore laat ondersoek om dié chroniese toestande te voorkom.
'n Operasie is nodig om 'n cholesteatoom te verwyder en die gehoor te herstel. 'n Infeksie moet ook eers met antibiotika behandel word.
SMS KUIER DOKTER en jou vraag na 37172 (R1 per SMS), of stuur ’n e-pos na kuier@kuier.co.za met DR GENINE in die onderwerplyn.