KERRIEFRIKKADELPASTEI
Genoeg vir 4 – 6 BESTANDDELE Vir die frikkadelle
750 g maalvleis 1 klein ui, fyngekap of gerasper 1 knoffeltoontjie 1 brandrissie, pitjies en naatjies verwyder en fyngekap 2 teelepels matige kerrie 1 eetlepels fyngekapte koljanderblare 1 teelepel gerasperde vars gemmer
Vir die kerriebonelaag
3 eetlepels botter 1 groot ui, fyngekap 1 knoffeltoontjie, gekneus en fyngekap 1 eetlepel koekmeelblom 2 teelepels matige kerriepoeier 2 koppies gekerfde groenbone, in kookwater geblansjeer of gestoom tot amper gaar 1 koppie vleisaftreksel sout en varsgemaalde swartpeper
Vir die beslag
4 eiers 1½ koppie melk 3 eetlepels gesmelte botter 1½ koppie koekmeelblom 1½ teelepel bakpoeier 1 teelepel sout
METODE
Meng al die bestanddele vir die frikkadelle. Gebruik jou hande en vorm frikkadelle wat net-net groot genoeg is om in die holte van jou hand te pas. Plaas op ’n bord en hou in die yskas terwyl jy die bonelaag maak: Verhit die botter in ’n swaarboomkastrol en braai die uie tot sag en deurskynend. Voeg die knoffel by en braai vir nog ’n minuut of twee. Roer die koekmeelblom en kerriepoeier by en braai vir 30 sekondes. Roer die bone by en sorg dat alles goed gemeng is. Voeg die aftreksel by en geur met sout en peper. Kook – terwyl jy heeltyd roer – totdat die mengsel begin dik word. Skep die mengsel in ’n gesmeerde oondvaste bak. Rangskik die frikkadelle bo-op en maak die beslag: Klits die eiers tot lig en skuimerig. Voeg die melk en botter by en klits goed. Sif die koekmeelblom, bakpoeier en sout saam en voeg alles gelyk by die eiermengsel. Klits totdat die mengsel glad is en giet oor die frikkadelle. Bak vir 40 – 50 minute teen 180ºC of totdat die frikkadelle gaar en die pastei mooi goudbruin bo-op is.