ITALIAANSE BEESVLEISKASSEROL MET KLUITJIES
Genoeg vir 4 BESTANDDELE Vir die kasserol
½ koppie koekmeelblom sout en varsgemaalde swartpeper na smaak 1 teelepel droë origanum 1 kg beesstowevleis 3 eetlepels olie 1 groot ui, fyngekap 2 knoffeltoontjies, gekneus en fyngekap 1 koppie beesvleisaftreksel 1 x 400 g blik geskilde en gekapte tamaties 2 groot rooi soetrissies, wit gedeeltes en pitjies verwyder en in repe gesny 2 – 3 kleinerige murpampoentjies, in muntstukkies gesny 1 kleinerige eiervrug, in blokkies gesny 1 eetlepel vars gekapte origanum
Vir die kluitjies
1∕2 koppie koekmeelblom ¼ koppie mieliemeel 1 teelepel bakpoeier ½ teelepel sout 1 eierwit 2 eetlepels melk 1 eetlepel olie
METODE
Maak eers die kasserol: Meng die halwe koppie koekmeelblom met die origanum en geur met sout en peper. Giet die meelmengsel op ’n plat bord uit en rol die vleisstukkies daarin. Verhit die olie in ’n swaarboomkastrol en braai die vleisstukkies alkant mooi bruin. Skep met ’n gaatjieslepel uit en hou eenkant. Braai die ui in dieselfde pot (jy kan nog ’n bietjie olie byvoeg indien nodig) tot sag en deurskynend. Voeg die knoffel by en braai vir nog ’n minuut of twee. Plaas die vleis terug in die pot. Voeg die res van die bestanddele by, geur met sout en peper en laat liggies prut vir 1½ uur. Maak die kluitjies: Meng die koekmeelblom, mieliemeel, bakpoeier en sout saam in ’n groterige bak. Maak ’n holte in die middel en giet die eierwit, melk en olie daarin. Meng goed. Skep teelepels vol van die deegmengsel op die kasserol. Bedek die pot en laat vir nog 20 minute saggies prut. Bedien dit net so uit die pot.