KREOOLSE KERRIEVARK-POTJIE

Genoeg vir 6

BESTANDDELE

1½ kg varkskenkels, in stukkies opgesaag 4 knoffeltoontjies, gekneus en fyngekap ½ koppie suurlemoensap ¼ koppie suiker 1½ teelepels fyn wonderpeper (allspice) ¾ teelepel fyn kaneel 3 eetlepels olie 1 groot ui, fyngekap 2 eetlepels matige kerriepoeier 4 koppies hoenderaftreksel 6 groot wortels, geskraap en in muntstukkies gesny 4 middelslag patats, geskil en in blokkies gesny 1 groen soetrissie, wit gedeeltes en pitjies verwyder en in repe gesny 3 lourierblare (bay leaves) 3 vars tiemietakkies (of 1 teelepel droë) Sout en varsgemaalde swartpeper na smaak 2 eetlepels botter 2 eetlepels koekmeel

METODE

Meng die knoffel en die suurlemoensap en giet dit in ’n glasbak saam met die varkskenkels. Gebruik jou hande en meng dit goed. Laat staan by kamertemperatuur en marineer vir ’n uur. Meng die suiker met die wonderpeper en kaneel en giet op ’n vlak bord uit. Rol elke stukkie vleis daarin sodat dit alkant bedek is. Verhit die olie in ’n swaarboomkastrol en verbruin die vleis in sarsies daarin. Voeg nog ’n bietjie olie by indien nodig. Skep die vleisstukke uit op ’n bord en hou eenkant. Braai die ui in dieselfde olie tot sag en deurskynend. Voeg die kerriepoeier by en braai vir ’n minuut of twee saam. Voeg ’n klein bietjie van die aftreksel by as jy bang is vir vasbrand. Voeg nou die res van die bestanddele, behalwe die koekmeel en botter, by. Bring tot kookpunt, verlaag die hitte, bedek die pot en laat prut vir 1½ uur. Haal die deksel af en kook so oop vir nog 20 minute sodat die vloeistof ’n bietjie kan wegkook. Maak ’n pasta van die koekmeel en botter en roer deur. Laat prut totdat die kerrie lekker dik begin word. Bedien saam met wit rys.

WENK: Jy kan beenlose blokkiesvleis ook gebruik vir hierdie gereg, maar dan moet jy jou kooktyd heelwat verkort – tot ongeveer 45 minute.