Matrieks leer mooi!
Kuier se eerste Winterskool vir matrieks is agter die rug en dit was ’n spesiale ervaring vir almal betrokke by hierdie inisiatief.
Toe Kuier die noodkreet van ouers hoor oor hoe hul kinders sukkel met hul matriekwerk, het ons besef ons móét help. En só is die idee vir die eerste
Kuier Winterskool gebore en is dit van 3 tot 7 Julie by Sarepta Sekondêre Skool in Kuilsrivier, Kaapstad, gehou.
Ons het op akademie sowel as inspirasie gefokus en het bekendes soos HemelBesem, Elana Afrika-Bredenkamp, Ivor Price, Gerald Petersen en Abduraghmaan Adams ingebring om met leerders te gesels. Hulle het almal ’n groot impak gemaak.
Ons het ook uitstekende en passievolle onderwysers betrek om klas te gee. Van die onnies is vakadviseurs en stel matriekvraestelle op en hulle was geskok omdat sommige leerders nie op dreef was met hul werk nie. ’n Paar onderwysers beplan nou om in September in hul eie tyd weer met die leerders op te vang.
Daar was ook ’n paar spesiale oomblikke gedurende die Winterskool. Een daarvan was om die absolute toewyding te sien van Lamone Magiel (foto hiernaas). Sy is Engels, maar het elke klas (wat in Afrikaans aangebied is) bygewoon. En dan was daar Grant Theunissen en Nazmia Patience wat al die pad van Touwsrivier en Gouda, honderde kilometers buite Kaapstad, gekom het om die Winterskool by te woon.
Die ander mooi oomblik was toe Michelle van Heerden, een van die onderwysers, wat ook ’n dosent by UWK is, namens twee leerders aansoek gedoen het om volgende jaar daar te gaan studeer. Dit sou nie gebeur het as dit nie vir die Kuier Winterskool was nie. En die manier waarop besighede en gewone mense aanboord gekom het om te help met kos en koeldrank vir die week, vervoer en die geskenkpakkies vir die matrieks, is bewys van hoeveel goedheid nog in ons gemeenskappe heers en hoeveel mense nog glo in ons jeug.