Het baba verloor
Vraag PYN NÁ SWANGERSKAP
Hoe gebeur dit dat ’n baba in jou tubes beland? Ek was onlangs swanger en het my baba op 10 weke weens ’n ectopic pregnancy verloor. Ek het ’n keisersnee ondergaan en hel gehad met wond-infeksie. Ek moes weer twee keer opereer word om die wond skoon te kry. Ek is baie deurmekaar oor die hele affêre en verstaan nog steeds nie wat gebeur het nie. VERWARD
Antwoord BESTEVERWARD
Ek is regtig jammer dat jy hierdie uiters moeilike en pynlike ondervinding moes deurmaak. Nie net fisiek nie, maar ook sielkundig.
’n Ektopiese swangerskap (ectopic pregnancy) ontstaan wanneer die bevrugte eiersel /embrio buite die baarmoeder/ uterus vasheg. In 95% – 99% van ektopiese swangerskappe heg die bevrugte eiersel aan die wande van een van die twee Fallopiusbuise vas. Dan word dit ’n buisswangerskap genoem, omdat dit in die Fallopiusbuis (Fallopian tube) vasheg. In minder as 5% van ektopiese swangerskappe kan die bevrugte eiersel ook in die buikholte/serviks/ lewer/maag/
milt vasheg. Oorsake kan dalk wees: • ’n Beskadigde Fallopiusbuis as gevolg van ’n vorige buisswangerskap. Pelviese inflammatoriese siektes, byvoorbeeld van die baarmoeder/uterus. Sekere seksueel oordraagbare siektes. Abnormaliteit aan die Fallopiusbuis. Vergroeiings en vernouings van die lumen (buisholte) van die Fallopiusbuise. Hormonale voorbehoedmiddels. Intra-uterine toestelle. Baarmoedermisvorming. Soms is dit nie een van die bogenoemde oorsake nie, dit gebeur maar net.
Die simptome van ’n buisswangerskap kan die volgende wees: ligte vaginale bloeding (amper soos ’n ligte maandstonde of“spotting”); naarheid; pyn in die lae gedeelte van die buik of skerp krampe in die buik; pyn slegs aan die een kant van die buik; lighoofdigheid en ’n gevoel van swakheid. Daar kan ook pyn in die nek of rektum of skouer wees – dit dui gewoonlik interne bloeding aan: die bloed in die buikholte irriteer die senuwees, wat dan die pyn verwys na die skouer of nek of rektum.
’n Buisswangerskap word gewoonlik gediagnoseer deur ’n positiewe swangerskapstoets (urine/bloedtoets) en ’n“leë” baarmoeder wanneer ’n sonar/ultrasound gedoen word. Die sonar kan dan die buisswangerskap in een van die buise lokaliseer.
Indien die swangerskap nog nie ver gevorder het nie, kan dit deur middel van medikasie beëindig word. Die embrio kan ook met ’n laparoskopie uit die Fallopiusbuis verwyder word as die swangerskap nog nie die buis laat bars het nie. Die laparoskopie doen minder skade en die buis kan dan weer normal funksioneer. Indien die swangerskap al ver gevorder is, en die buis geskeur of selfs gebars het, móét ’n noodoperasie gedoen word om die interne bloeding te stop. Tydens die operasie word die embrio en die geskeurde of gebarste buis verwyder. Die operasie wat jy ondergaan het, was dus nie ’n keisersnit nie, maar wel ’n salpingektomie (verwydering van een van die Fallopiusbuise). Die eksterne snit/wond is dieselfde, maar die interne operasie verskil hemelsbreed. Die infeksie wat jy in die wond opgedoen het, kan baie oorsake hê. Miskien is dit die haas waarmee die noodoperasie gedoen is. Dis regtig jammer dat jy dit óók nog moes deurmaak, veral ná so ’n traumatiese ondervinding. ’n Buisswangerskap beteken nie dat jy nooit weer sal swanger raak nie. Soms is dit ’n geïsoleerde geval. Jy moenie jouself blameer ná ’n buisswangerskap nie. Daar is niks wat jy kon doen om dit te verhoed nie. Gaan spreek die maatskaplike werker by die hospitaal of kliniek en vra dat sy/hy jou vir berading verwys. Jou ondervinding was baie traumaties en jy het al die hulp nodig om daardeur te werk. Alle sterkte.
SMS KUIER DOKTER en jou vraag na 37172 (R1 per SMS), of stuur ’n e-pos na kuier@kuier.co.za met DR GENINE in die onderwerplyn.
’n Ektopiese swangerskap (ectopic pregnancy) ontstaan wanneer die bevrugte eiersel /embrio buite die baarmoeder/ uterus vasheg.