Wat sÊ gelowe oor vleis?

Halaal

Halaal is ’n Arabiese woord wat“wettig” of“toelaatbaar” beteken vir Moslems. Die antoniem van halaal (wettig) is haram (onwettig) wat verwys na onwettige items. Moslems word slegs toegelaat om die vleis van sekere diere te eet. Vark word glad nie toegelaat nie en niks wat as halaal geklassifiseer was, mag enigsins in aanraking kom met enige iets wat haram is nie. Diere moet ook volgens die gespesifiseerde rituele prosedures geslag word. Die dier moet lewendig en gesond wees, slegs ’n Moslem mag die slagwerk volgens die gepaste ritueel uitoefen, en die dier se keel moet vinnig en met een slag met ’n skerp mes gesny word en die dier mag nie in die proses ly nie. Daarna moet die bloed uit die karkas gedreineer word.

Kosher

In Hebreeus beteken “Kashrus”, waarvandaan die woord kosher afkomstig is, geskik of suiwer. Die wette van “Kashrus” bevat ’n omvattende wetgewing oor hoe toegelate en verbode kosse vir Jode voorberei moet word. Die enigste tipe vleis wat geëet kan word, is beeste en wild wat kloofhoewe het en plantvreters is. Voorbeelde van kosherdiere is bulle, koeie, skape, lammers, bokke en springbokke. Verder moet ’n kosherspesie slegs deur ’n “Schochet” (’n rituele slagter) geslag word. Aangesien die Joodse wet dit verbied om diere te laat ly, moet die slagtery op só ’n wyse plaasvind dat bewusteloosheid oombliklik is en die dood byna onmiddellik plaasvind.