TRADISIONELE HOENDERPASTEI

Genoeg vir 6

BESTANDDELE Vir die vulsel

1 groot heelhoender 1 groot ui, fyngekap 1 lourierblaar 7 swartpeperkorrels 5 alllspice-korrels (wonderpeper) 3 naeltjies Sout en varsgemaalde swartpeper na smaak 1 hoenderblokkie 8 eetlepels sago, in koue water geweek 1 eiergeel 2 eetlepels suurlemoensap 4 hardgekookte eiers, fyngekap

Vir die pasteideeg

1 x 400 g rol bevrore skilferdeeg, ontvries 1 geklitste eier

METODE

Plaas die hoender in ’n kastrol waarin dit knap pas. Giet genoeg koue water in die kastrol om die hoender te bedek. Voeg die uie en speserye by. Verkrummel die hoenderblokkie en voeg ook by. Bring tot kookpunt, verlaag die hitte, en bedek die pot. Laat liggies prut totdat die hoender sag en gaar is en die vleis van die been af val. Verwyder die vel en bene en sny die vleis in kleiner stukkies. Plaas die hoenderstukkies in ’n kastrol en skep van die kookvloeistof by die hoender en geur met sout en peper na smaak. Roer die sago by en skep heeltyd van die kookvloeistof by totdat jy ’n lekker dikkerige pasteivulsel het. Roer die eiergeel en suurlemoensap vinnig by om te keer dat dit skif. Skep die mengsel in ’n dieperige tertbord. Skep die hardgekookte eier boop. Rol die deeg uit op ’n meelbestrooide oppervlak en sny ’n deksel vir die pastei uit. Plaas dit versigtig bo-op die vulsel en druk die rande teen die rand van die bak vas. Gebruik ’n skerp mes om kepies in die deeg te sny sodat die stoom kan ontsnap. Gebruik die orige deeg om mooi patroontjies te sny en die pasteideeg daarmee te versier. Verf die geklitste eier bo-oor die deeg en bak in ’n voorverhitte oond van 200ºC vir 30 – 40 minute of totdat die pastei mooi goudbruin is.

WENK:

Jy kan die tertbord met deeg voer én die vulsel met ’n deeglaag bedek, maar dan sal jy twee rolle bevrore skilferdeeg nodig hê.