Besonderse Kaapse koffiewinkel smaak sukses
Vir laat slaap het dié antie en haar man nie lus voor nie. Hulle woeker van vroegdag af al in hul spesiale koffiewinkel.
In hul sestigs sien baie mense uit na ’n rustiger lewe, om permanent op vakansie te wees, later te slaap en meer tyd met die kleinkinders deur te bring. Maar nie Suzie Mathys en haar man, Willie, nie. Dié ouma en oupa het eerder besluit om ’n besigheid te begin op die ouderdom wanneer die meeste mense aftree.
Hierdie ouma en oupa wat al 42 jaar getroud is, wys ons nie net dit is moontlik nie, maar ook dat dit kan werk. Suzie (66) en Willie (68) het die afgelope drie jaar ’n liefde vir die platteland ’n slim stap verder gevat toe hulle dit in ’n besigheid omskep en ’n koffiewinkel, Suzie’s Coffee Shop, begin het.
Afhangend van waar jy woon, het almal ’n idee van hoe ’n gewone koffiewinkel moet lyk. ’n Mens sou verwag om dit in ’n hoofstraat of ’n winkelsentrum te vind, maar Suzie se koffiewinkel is in die hartjie van ’n Kuilsrivier-woonbuurt in Kaapstad se noordelike voorstede. Die naam“Suzie’s Coffee Shop”op ’n vaal muur tussen twee huise is al aanduiding dat daar iewers ’n koffiewinkel is.
Maar soos die Engelse sou sê,“don’t judge a book by its cover”. Want van die eerste oomblik wanneer die hek oopgaan, word jy na ’n ander wêreld weggevoer. Daar is so baie unieke tafels, stoele en beeldjies wat dit laat voel asof jy by ’n kunsuitstalling is en nie in die tuin van ’n koffiewinkel nie.
In een hoek van die tuin is daar ’n buiteoond met ’n vuur wat al van vroegoggend af brand. Dit word gebruik om hul signature roosterbrood te maak (daar is selfs ’n roosterbrood-burger) wat saam met ontbyt en middagete bedien word. In die ander hoek is ’n gemakhuisie met koerantpapier, soos wat hulle in die ou dae gebruik het.
Voor jy nog ’n voet binne die koffiewinkel sit, begroet die reuk van varsgemaalde moerkoffie jou. Binne brand daar ’n kaggel in die middel van ’n groot sinkdakvertrek met ou straatname, petrolpompe teen die mure en mosaïektafels met boomstomppote. Vir ’n oomblik voel dit asof jy in ’n koffiewinkel in ’n sjarmante klein dorpie soos McGregor of Greyton is en nie ’n gewone woonbuurt in Kaapstad nie.
brein agter die koffie
Antie Suzie en oom Willie, soos mense hulle noem, se glimlagte laat ’n mens sommer nóg meer welkom voel. As jy so na hul grys hare kyk, kan jy nie glo hierdie paartjie is die brein agter dié besonderse koffiewinkel nie. Nie een van hulle, wat self op plattelandse dorpies grootgeword het, het ’n besigheidsagtergrond nie.
Suzie is ’n afgetrede naaldwerkonderwyser en Willie het die afgelope 20 jaar as ’n gemeenskapswerker vaardigheidsontwikkeling-werkwinkels vir gestremdes aangebied. Maar met die hulp van hul seun William-John (36) wat ’n graad in sakebestuur het, is hulle vinnig besig om hul besigheid te laat groei en ’n sukses daarvan te maak.
Suzie en Willie het die afgelope sewe jaar ’n klein kleuterskool bestuur op die perseel waar die koffiewinkel vandag is. Maar al was Suzie ’n onderwyseres, was naald- en handwerk haar eintlike passie.
Toe haar suster die bestuur van die kleuterskool oorneem, het Suzie haar mosaïekwerk en naaldwerk in ’n ander kamer gedoen. Ouers en vriende het begin inloer en wou van haar goed koop en toe stel Willie voor sy verkoop koffie vir die mense wat kom inloer.
“Aan die begin wou ek dit nie doen nie, want ons het nie geld gehad vir ’n koffiewinkel nie. Maar toe stem ek in, op voorwaarde dat ek net moerkoffie gaan maak omdat dit die enigste ding is wat ek ken,”sê Suzie.
Mense het die koffie begin koop en saam in die kamer om drie tafels begin kuier. Willie het gesien hulle sal verder moet uitbrei, maar hulle het nie geld gehad nie. Gelukkig is sy en Willie albei goed met hul hande en het dit gehelp om baie van die goed wat hulle nodig gehad het, self te maak.
“My man is baie kreatief en is eintlik die een met al die idees. Hy het besluit ons bou ’n sinkvertrek buite op die stoep aan en voeg buitetafels by. Ek het gedink dis ’n slim plan omdat dit bygedra het tot die plaas-atmosfeer wat ons wou skep. Ons het op die platteland grootgeword en het almal sinkdakke gehad. Dié goedkoop plan het ook gehelp met die image van die plek. Dit het ons ook gehelp om te onthou waarvandaan ons kom en ons wou ander laat terug dink aan hulle eie roots,”sê Suzie.
Dit het gewerk en ál meer mense het die koffiewinkel besoek. Mense het hul boeke kom lees of net kom sit en gesels. Willie het gevoel hulle moet iets by die koffie begin gee.
Hulle het mense uit die gemeenskap gebruik om koek te bak en het eers net koek en toe later ontbyt ook by die koffie begin bedien. Omdat hulle ’n gedeelte van hul huis gebruik het, het hulle baie geld gespaar omdat hulle nie huur moes betaal nie. Willie het ook die meeste van die tafels self uit hout gemaak, terwyl Suzie die mosaïek vir die tafelblad gedoen het. Van die ander goed het hulle gekry of iewers gevind. Niks van die goed in die winkel pas regtig bymekaar nie, maar sáám maak dit die winkel interessant.
Maar selfs met al die besparings was dit steeds nie maklik om die winkel aan die gang te hou nie.
brei besigheid uit
Nie een van hulle het ’n besigheidsagtergrond nie en het met hul harte gewerk en nie met hul koppe nie. En dís waar William-John die groot ver-skil gemaak het.
“Ek het geweet hulle het ’n gem. Daar was ’n mark in die gemeenskap vir ’n koffiewinkel. Maar saam met ’n kleuterskool het dit nie gewerk nie. Die kinders het baie geraas en mense wil ontspan wanneer hulle by ’n koffiewinkel kom kuier. So, ek het geweet ons moet op een konsentreer en ook dan die ekstra spasie gebruik om uit te brei,”sê William-John.
Suzie en Willie kon gelukkig van hul vorige personeel werk aanbied by die koffiewinkel en het net twee kamers in die huis vir hulself gehou. Die res van die huis is gebruik om die koffiewinkel groter te maak en ’n lokaal vir funksies (soos boekbekendstellings, baby showers, partytjies, ens.) te skep. Hulle het ook nou twee kamers wat beskikbaar is vir bed en breakfast.
Sedert Maart vanjaar het hulle ook middagete op die spyskaart gesit en ’n webtuiste en Facebook-blad begin. William-John het geweet goeie bemarking sal ’n groot rol in die koffiewinkel se sukses speel. Om by te bly, moes Suzie en Willie op hul ouderdom leer van verskillende tipes koffie en ook hoe om Facebook te gebruik.
Dit was moeilik om die kopskuif van passie na besigheid te maak, maar hierdie egpaar is besig om dit reg te kry.
“Ons moet goeie besluite maak sodat ons nog ons werkers aan die einde van die maand kan betaal. Ek en Willie het al die idees, maar William-John weet hoe om die besigheidsgedeelte te laat werk. Só nou het ons ’n goeie balans en hoop ons om binne die volgende paar maande die besigheid winsgewend te maak.”
Maar vir Suzie en Willie gaan dit oor meer as net geldmaak. Vir hulle gaan dit oor die mense wat hulle elke dag ontmoet en die plesier wat mense kry wanneer hulle oor ’n lekker koppie koffie kan gesels.
“Ek het nooit gedink dit sal moontlik wees nie, maar my man het my bygestaan en saam het ons dit laat werk. Ek dink baie keer limit ons onsself of ons is bang om kanse te vat. Maar as jy nie die kans waag nie, sal jy nooit weet of jy suksesvol kan wees nie. As óns dit kon doen, kan ander ook. Ek weet geld speel ’n groot rol in mense se besluite, maar somtyds kort jy net ’n bietjie kreatiwiteit.”
En kyk hoe ver het kreatiwiteit hierdie paartjie gebring!