Neem deel aan die avonture by die Garden Route Nasionale Park
Die Garden Route Nasionale Park is dié plek om die natuurskoon te geniet of jou adrenalien te laat pomp.
Die Tuinroete, wat strek oor die SuidKaap en die Oos-Kaap, lok duisende besoekers en is ’n ware lushof vir toeriste. Die pad deur die Garden Route Nasionale Park en die omgewing sal jou na jou asem laat snak as jy dié asemrowende deel van Suid-Afrika besoek.
Die Garden Route Nasionale Park bestaan uit die Wildernis-, Knysna- en Tsitsikamma-seksie. Hier sal jy bekostigbare akkommodasie en verskeie pretaktiwiteite vir die hele gesin kry.
Die Tsitsikamma-seksie is 615 km vanaf Kaapstad en 195 km vanaf Port Elizabeth geleë. Die Stormsriviermond-ruskamp en Nature’s Valley is in die Tsitsikamma-seksie en bied die ideale vakansie vir enigeen wat na rus, avontuur en ongelooflike natuurskoon smag.
Net ’n klipgooi van die Tsitsikamma-seksie af, tussen Knysna en Plettenbergbaai, is die prentjiemooie Garden of Eden – die perfekte geleentheid om bene te strek en piekniek te hou in die woud. Di tis rolstoelvriendelik, met hout paadjies en bruggies. Die gerieflike en bekostigbare akkommodasie, omring deur die idilliese natuurskoon, maak die Garden Route Nasionale Park een van die gewildste bestemmings om te besoek.
TSITSIKAMMA
Die see is ’n klipgooi ver van die verblyfeenhede en die ongelooflike landskap bied ’n fees vir die oog. Daar is verskillende verblyfopsies beskikbaar:
Familie-huiseenhede met twee slaapkamers waar vier mense kan slaap en ’n oopplan-leefarea met ’n volledig-toegeruste kombuis.
Boshutte met een slaapkamer en leefruimte (jy het die opsie van ’n hut met ’n badkamer of een sonder ’n badkamer).
Romantiese wegbreek in die wittebrood-eenhede. (Dit het ’n oopplanbadkamer, ’n sitkamer en is letterlik by die water geleë met ’n kalmerende uitsig oor die see.)
Die glamping-houteenhede (glansryke kamp-akkommodasie) by Nature’s Valley is iets wat jy móét beleef. Die selfsorgeenheid wat uitkyk oor die bos, is toegerig met die basiese benodigdhede as jy in styl wil kamp. Jy kry ’n ware kampervaring met die nabye kabbelende rivier, omring deur die groen lowerryke woud.
WILDERNIS
Hierdie eenhede is goed toegerus met alles wat jy sal nodig hê om jou wegbreek ekstra spesiaal en onvergeetlik te maak. Van die verblyfeenhede is op die rivieroewer geleë en jy kan ontspan terwyl jy die diere op die oorkantse oewer dophou.
Jy sal ook stomgeslaan wees deur die wye verskeidenheid voëlsoorte, terwyl jy ’n sonsondergang-bootrit met peuselhappies geniet.
KNYSNA
Oornag in die vierster Harkerville Treetop chalet met twee dubbelslaapkamers, elkeen met sy eie badkamer. Hierdie stylvolle chalet het ’n binne- én buitekaggel, skottelgoedwasser, wasmasjien en tuimeldroër, DStv, telefoon en alarmstelsel.
Die Diepwalle-tenteenhede is bo-op
’n houtdek geleë. Daar is braai-areas en elektrisiteit, en besoekers het toegang tot gemeenskaplike ablusiegeriewe, yskas, wasmasjien en tuimeldroër.
Behalwe die lowergroen landskap, spog Knysna met ’n unieke toeriste-aantreklikheid. Besoek die Seeperdjie-tenke by die Knysna Thesen-eilandkantore om die bedreigde seeperdjie te sien. Dié seeperdjie kom slegs voor in die Knysna-, Keurbooms- en Swartvlei-riviermondings en nêrens anders in die wêreld nie. Die Knysna-seeperdjie is gelys as bedreig op die IUCN se Rooi Lys – die eerste seeperdjie ter wêreld wat beskerm word.
AKTIWITEITE
Avontuurlustiges kan die Stormsrivier verken op die kayak- en lilo-toere. Die ervare span sal seker maak jy is veilig, terwyl jy jou gate uit geniet.
Maak van nader kennis met die seelewe en neem deel aan die fantastiese snorkelen skuba-aktiwiteite.
Die hoë hangbrug oor die rooibruin wa- ters van die Stormsriviermond, is 77 meter lank. Dit is gebou in 1969 en is steeds een van die gewildste toeriste-aantrekkings in die Tsitsikamma-area.
Gaan op ’n canopy-toer en beskou die woud vanuit die boomtoppe onder die wakende oog van ’n opgeleide toergids. Seil met ’n staalkabel van een boomplatform na ’n ander en geniet die uitsig.
Ander aktiwiteite sluit in staproetes deur die skilderagtige parke, kano en visvang, bergfietsroetes of piekniek.
Tussen die Wildernis- en Tsitsikammaseksie kan jy ook besoek aflê by die skouspelagtige Big Tree, ’n 800 jaar oue geelhout boom wat 36,6 meter hoog is.