SEEKOS-RAVIOLI

Genoeg vir 4 BESTANDDELE

2 eetlepels botter ½ ui fyngekap 1 teelepel vars knoffel 1 koppie seekosmengsel ontvries 2 eetlepels gekapte pietersielie ½ koppie roomkaas 1 teelepel sout Knippie varsgemaalde swartpeper Beslag pastadeeg (sien resep onder)

Pastadeeg

2 eiers teen kamertemperatuur 200 g koekmeel

METODE

Soteer die ui en knoffel in botter tot sag. Voeg die seekos en pietersielie by en braai tot gaar en droog. Skep uit en laat heeltemal afkoel. Meng die roomkaas met die sout en peper. Voeg die afgekoelde seekos daarby en roer deur.

Pastadeeg: Gooi die meel in ’n mengbak en maak ’n holte in die middel. Klits die ei- ers liggies met ’n vurk en gooi in die holte. Werk die eier geleidelik by die meel in met behulp van ’n vurk. Keer dan die deeg uit op ’n skoon werkoppervlak en werk tot die deeg bymekaarkom. Knie vir 5 minute, draai toe in kleefplastiek en laat rus vir 30 minute. Verdeel die deeg in 2 ewe groot stukke. Rol albei stukke op ’n meelbestrooide oppervlak tot ’n dikte van 1 – 2 mm. Skep lepelsvol van die vulsel, 5 cm uit mekaar uit. Verf die oop gedeeltes tussen die vulsel met ’n nat kwassie. Plaas die ander stuk uitgerolde deeg bo-op. Maak seker alle oortollige lug tussenin is uit. Vorm soos pasteitjies en druk uit met ’n glas of koekiedrukker. Laat ’n rant van omtrent 1 cm reg rondom. Druk die rante stewig vas met ’n vurk. Pak op ’n meelbestrooide skinkbord en laat rus vir so 15 minute. Verhit genoeg water in ’n dieperige kastrol. Voeg 1 eetlepel sout by die water. Dompel ’n paar ravioli’s op ’n slag in die water en kook vir 1 – 2 minute. Skep uit met gaatjieslepel, plaas op bord en bedruip met olyfolie. Bedien dadelik met ’n tamatiesous of -smoor.