Kersfeesmenu is uitgesort; jy moet dit net maak!
Soek jy idees vir jou Kerstafel? Ons het ’n keur van feestelike resepte bymekaar gesit om jou maaltyd ekstra spesiaal te maak. En dis so maklik om te maak!
HAM MET MUSKADEL EN KORRELKONFYT Genoeg vir 4 – 6 BESTANDDELE Vir die gaarmaak van die ham
1 ham van ongeveer 2,5 – 3 kg 2 heel wortels, geskraap 1 groot ui, geskil en heel 5 naeltjies ’n Handvol varsgekapte pietersielie 1 lourierblaar 7 swartpeperkorrels 1 teelepel mosterdpoeier 1 eetlepel heuning 1 koppie muskadel 20 – 30 naeltjies Genoeg water om die ham te bedek
Vir die glans
1 koppie korreldruiwekonfyt 1 koppie muskadel 2 eetlepels olie
Vir die uie
4 uie, geskil en in kwarte gesny 1 brandrissie, naatjies en pitjies verwyder en in stukkies gesny 1 koppie muskadel Sout en peper Korrels van die druiwekonfyt (wat agterbly nadat die glans voorberei is)
METODE
Plaas ham en wortels onderin ’n groot kastrol. Druk 5 naeltjies in ui en plaas in die kastrol. Voeg die res van die bestanddele by en koue water om die ham te bedek. Bring tot kookpunt, verlaag hitte en bedek pot. Prut vir sowat 1 – 1½ uur – dis so 30 minute per 500 g vleis. Haal vel netjies af. ’n Lagie vet moet agterbly. Maak bo-op netjiese snye (diamantpatroon) met ’n skerp mes tot by vleislaag. Druk ’n naeltjie in op elke hoek van die diamante. Vir die glans: Meng druiwekonfyt en muskadel en giet deur ’n sif sodat korrels agterbly. Roer olie by die vloeistof en hou korrels vir uie. Verf die helfte van die glans oor ham met ’n kwas. Bak vir 30 – 45 minute in ’n voorverhitte oond van 160 º C. Verf die res van die glans ná elke tien minute oor. Vir die uie: Plaas uie in ’n oondvaste bak met die res van die bestanddele. Bedek bak met foelie en bak vir ’n uur in ’n voorverhitte oond van 200 º C. Haal foelie die laaste 20 minute van baktyd af en bak oop. Skep uie op ’n mooi opdienbord en plaas die ham bo-op.
SAMPIOENRYS Genoeg vir 4 – 6 BESTANDDELE
3 eetlepels botter 1 eetlepel olie 1 groot ui, fyngekap 3 knoffeltoontjies, gekneus en fyngekap 250 g wit knopiesampioene 250 g bruin sampioene 2 koppies rou rys 1 eetlepel varsgekapte roosmaryn 4 koppies hoender- of groente-aftreksel Sout en varsgemaalde peper na smaak
METODE
Verhit die botter en olie in ’n swaarboomkastrol oor matige hitte en braai die ui daarin tot sag en deurskynend. Voeg die knoffel en sampioene by en braai ’n paar minute saam. Voeg die roosmaryn by terwyl die sampioene braai. Voeg die rys by en braai ’n paar minute saam met die sampioene voordat jy die aftreksel byvoeg en geur met sout en peper. Roer goed deur, verlaag die hitte en laat so onbedek staan en prut vir ongeveer 20 – 30 minute of totdat die meeste van die vloeistof weggekook het. Sit die stoofplaat af en laat staan die pot daarop vir ongeveer 10 minute.
GROENSLAAI Genoeg vir 8 – 10 BESTANDDELE Vir die slaai
400 g bevrore ertjies 200 g sugar snap peas 200 g boontjies, gekerf 3 selderystingels, in stukkies gekap 150 g jongspinasie ’n Handvol varsgekapte mintblare 1 rooi-ui, in dun skyfies gesny
Vir die slaaisous
5 eetlepels olie 1 eetlepel Dijon-mosterd 2 eetlepels rooiwynasyn 1 knoffeltoontjie, gekneus en fyngekap 1 teelepel strooisuiker Sout en varsgemaalde swartpeper
METODE
Plaas ’n kastrol met soutwater op die stoof en bring tot kookpunt. Plaas die twee verskillende soorte ertjies en die boontjies in die water en laat vir 2 – 3 minute kook. Dreineer en spoel af onder koue water. Rangskik die jongspinasie in ’n mooi slaaibak. Skep die ertjie- en-boontjiemengsel bo-op en voeg die seldery, mintblare en rooi-ui by. Meng goed. Klits die bestanddele vir die slaaisous saam en giet oor die slaai. Meng goed.
GEROOSTERDE LAMSBOUD Genoeg vir 4 BESTANDDELE Vir die frikkadelle
500 g mince 1 ui, fyngekap 2 snye brood, verkrummel 1 teelepel droë tiemie Sout en varsgemaalde swartpeper 1 teelepel mosterdpoeier 1 teelepel heuning Gerasperde skil van 1 suurlemoen 1 eier, effens geklits
Vir die lamsboud
1 kleinerige lamsboud van ongeveer 1,5 kg 5 eetlepels olyfolie (of sonneblom- of canolaolie) 2 eetlepels heuning Sout en varsgemaalde swartpeper 1 teelepel mosterdpoeier 1 teelepel droë tiemie Gerasperde skil van 1 suurlemoen 2 eetlepels suurlemoensap 6 groot uie, geskil en in wîe gesny 6 vars tiemietakkies 1 koppie vleisaftreksel 1 koppie droë witwyn (of ekstra aftreksel)
METODE
Vir die frikkadelle: Meng al die bestanddele vir die frikkadelle en vorm tafeltennisballetjie-grootte frikkadelle. Bêre in die yskas tot benodig.
Vir die lamsboud: Neem ’n vlymskerp mes en steek die lamsboud oral vol fyn snytjies. Meng die olie en heuning en smeer die hele boud daarmee. Meng die mosterdpoeier, tiemie en suurlemoenskil met sout en peper en smeer dit oor die hele boud. Rangskik die uie en tiemietakkies onderin ’n oondroosterpan en geur met sout en peper. Plaas die boud bo-op en rooster vir 20 minute in ’n voorverhitte oond van 200oC. Meng die suurlemoensap, aftreksel en wyn en giet onderin die pan. Verlaag die hitte tot 180oC en bak vir nog 1½ – 2 uur of totdat die boud regdeur gaar is. Haal die skottel uit die oond ’n halfuur voor die baktyd verby is en rangskik die frikkadelle in die uiemengsel om die boud. Bak vir 30 minute tot gaar. Skep die uie onderin die oondskottel op ’n groot plat opdienbord uit. Plaas die boud bo-op en rangskik die frikkadelle rondom. Bedien met geroosterde aartappels of witrys en gestoomde groente.
FEESTELIKE SOETSUUR HOENDER Genoeg vir 4 BESTANDDELE Vir die sous
1 eetlepel komynsaad 1 eetlepel koljandersaad ¹/3 koppie olie 1 middelslag ui, fyngekap 1 middelslag wortel, geskraap en fyngekap 6 knoffeltoontjies, gekneus 1 lourierblaar 2/3 koppie rooiwynasyn ½ koppie water Sout en varsgemaalde swartpeper
Vir die hoender
8 hoenderstukke Sout en varsgemaalde swartpeper 2 eetlepels olie 1 rooi brandrissie, naatjies en pitjies verwyder en fyngekap ½ koppie sultanas ¾ koppie mintblare
METODE
Vir die sous: Rooster die komyn en koljander in ’n droë middelslag kastrol op ’n stoofplaat oor matige hitte. Voeg die ¹/3 koppie olie, die ui, wortel en knoffel by en braai totdat die ui sag en deurskynend is. Voeg die lourierblaar, asyn en water by en bring die mengsel tot kookpunt. Verlaag die hitte en laat vir ’n minuut lank prut. Haal die kastrol van die hitte af en voeg sout en peper by. Vir die hoender: Geur die hoederstukke met sout en peper. Verhit die 2 eetlepels olie in ’n swaarboompan of -pot wat ook in die oond kan gaan. Braai die hoender in sarsies tot alkant mooi goudbruin. Plaas al die hoenderstukke met die velkant na bo terug in die pot. Die pot of pan moet groot genoeg wees sodat die hoenderstukke in ’n enkellaag kan pas. Giet die marinade in die pot sodat die vleisgedeeltes van die hoender daarin lê maar die vel onbedek is. Sprinkel die rissie en sultanas bo-oor. Bak in ’n voorverhitte oond van 200oC vir 30 – 40 minute of tot die hoender deurgaar is. Skep met sous en al op ’n mooi opdienbord en sprinkel die mintblare bo-oor.
RASPBERRY-EN-SUUR-LEMOENDRANKIE Genoeg vir 4 BESTANDDELE
1 koppie raspberries (frambose) 1 eetlepel strooisuiker (castor sugar) ’n Handvol vars mintblare 1 x 3 cm knoets vars gemmer, geskil en baie fyn gekap Ysblokkies 1 liter bittersuurlemoen-vonkel (Schweppes Bitter Lemon)
METODE
Plaas die raspberries, strooisuiker, mintblare en gemmer onderin ’n stewige glasbeker en gebruik ’n houtlepel om dit effens te stamp en te kneus om die geur na vore te bring. Voeg ys by en vul die beker met bittersuurlemoen-vonkel. WENK: Jy kan gemmerbier in die plek van die bittersuurlemoen gebruik.
AARBEI-EN-KARAMELKAASKOEK-TRIFLE Genoeg vir 4 – 6 BESTANDDELE Vir die kaaskoeklaag
½ van 250 g houer roomkaas 1 blikkie karamelkondensmelk (gebruik 2 eetlepels hiervan vir die krummellaag) 150 ml room 1 eetlepel versiersuiker (icing sugar) 1 teelepel vanilla essence
Vir die jellielaag
1 pakkie aarbeijellie 1 koppie kookwater 1 koppie ongegeurde volroomjogurt
Vir die krummellaag
1 pakkie karamelgeur (of gewone) tennisbeskuitjies, verkrummel 1 eetlepel gesmelte botter 2 eetlepels karamelkondensmelk (skep van die blikkie wat jy vir die kaaskoeklaag gaan gebruik)
Vir die samestelling
1 koppie aarbeie, in skyfies gesny 1 koppie dik vla ½ koppie geroosterde amandelvlokkies
METODE
Vir die kaaskoeklaag: Klits die roomkaas en res van die karamelkondensmelk (nadat jy 2 eetlepels daarvan vir die krummellaag afgeskep het) saam tot net-net gemeng. Klits die room in ’n aparte mengbakkie totdat dit begin stywe punte maak. Klits die versiersuiker en vanilla essence by. Vou die roommengsel by die roomkaasmengsel in. Skep in ’n glasbak. Bedek met kleefplastiek en plaas in die yskas vir minstens 1 uur.
Vir die jellielaag: Meng die jellie met die kookwater. Roer goed totdat die jellie heeltemal opgelos is. Laat staan om af te koel tot kamertemperatuur. Gebruik ’n draadklitser om die jogurt liggies by te klits. Giet in ’n glasbak, bedek met kleefplastiek en plaas in die yskas tot heetemal gestol.
Vir die krummellaag: Meng die koekiekrummels met die gesmelte botter en karamelkondensmelk.
Vir die samestelling: Gebruik ’n mooi glasbak en bou jou koekstruif deur afwisselende lae krummels, jellie, kaaskoekmengsel, vars aarbeie, amandelvlokkies en vla te gebruik. Eindig met ’n laag kaaskoekmengsel en garneer met amandelvlokkies en vas aarbeie.
Kersfees sonder koekstruif is soos vonkelwyn sonder vonkel. Karen Hart