ONTDEK DIE WONDERS VAN AGULHAS
Kom beleef die ongelooflike natuurskoon, slaap oor by een van die gerieflike ruskampe en leer meer oor dié erfenisgebied.
op Suid-Afrika se mees suidelike punt, omring deur kilometers van asemrowende kuslyn en unieke plantegroei, sal jy die beeldskone Agulhas Nasionale Park vind.
Kom en beleef die Kaap van Storms, waar verskeie skepe langs die kus na die oseaan se grafkelders gesink het en waar indrukwekkende stories van die see en die erfenis van hierdie historiese gebied, jou verbeelding sal aangryp.
Die Agulhas Nasionale Park, net buite Struisbaai in die Wes-Kaap, is 210 km vanaf Kaapstad geleë. Dit bestaan uit die Agulhas-, Rhenosterkop- en Bergplaas-seksies en is die perfekte plek om te ontspan. Die meeste staproetes en uitkykpunte om die kus is rolstoel-vriendelik, met houtpaadjies en bruggies, wat perfek is om jou bene te strek en ietsie te eet terwyl jy die natuur aanskou.
Die Agulhas Nasionale Park is ’n goudmyn vir toeriste. Jy kan die gewilde Kaap Agulhas-vuurtoring besoek of voor die punt se monument ’n selfie neem bewyse dat jy by die punt van Afrika is waar twee oseane bymekaar kom.
Weens sy ryk biodiversiteit het die laagliggende gebied (die Agulhas-vlakte) internasionale bekendheid verwerf. Dit vorm deel van die Kaapse blommeryk en spog met meer as 2 000 inheemse plante, fynbosstruike, sandsteenfynbos, vleilande, ongewerwelde diere en bedreigde voëls.
GEMAKLIKE VERBLYF
Die gerieflike en bekostigbare akkomodasie is ’n klipgooi van die see af en omring deur die idilliese natuurskoon van die Overberg.
Agulhas
Kuier rondom ’n gesellige vuurtjie en word wakker met die klanke van golwe in die agtergrond by die Agulhas-ruskamp.
Die vyftien kapstylhuis-eenhede bied ongelooflike uitsigte van die see en bos wat net ’n paar treë van jou deur af is.
Die historiese Lagoon House is in 1898 deur PK Albertyn vir sy vrou as ’n verjaar-daggeskenk gekoop en later het hy ’n kothuis ook vir haar aangebou. Die klein strandmeer langs die huis het haar aan ’n boek herinner wat sy gelees het met die naam Blue Lagoon. Daar is ’n volledig-toegeruste kombuis, ’n groot sitkamer en vier slaapkamers.
Daar is ook vyf familie-huiseenhede en elkeen het twee slaapkamers en groot ensuite badkamers met ’n toilet en stort. Elke eenheid het ’n kaggel en ’n groot stoep met braaigeriewe. Die selfsorgverblyf kom ook met ’n oopplan-eetkamer, ’n volledig-toegeruste kombuis en ’n sitkamer met TV en DStv.
Vir kleiner groepies is daar die opsie van eenslaap-kamereenhede. Hierdie chalets het twee enkelbeddens, ’n oopplankombuis en sitkamer sowel as ’n groot stoep met braaigeriewe.
Rhenosterkop
Die Rhenosterkop-ruskamp is 31 km van die Kaap Agulhas-vuurtoring af en gee jou ’n regte plaasgevoel. Daar is drie selfsorgeenhede waarvan twee eenhede vir vier mense is en een vir twee mense. Elkeen van hierdie unieke plaashuise is ten volle toegerus met kombuis-toebehore noodsaaklik vir selfsorgverblyf, soos ’n yskas, borde en eetgerei.
Bergplaas
Die Bergplaas-ruskamp aan die noordelike voetheuwels van die Soetanysberg, is 36 km van die Kaap Agulhas-vuurtoring en is ’n klein paradys om in te ontspan. Hier
is ’n gastehuis met vyf slaapkamers. Dit is ook selfsorgverblyf met ’n groot leefarea en volledig-toegeruste kombuis. Die groot buitestoep is perfek vir onthaal.
VERKEN DIE OVERBERG
Die gewilde vuurtoring is sedert 1845 in werking en is as nasionale monument en ’n Wes-Kaapse erfenisgebied verklaar. Dit is ook die enigste vuurtoring in die land met ’n museum, restaurant en geskenkwinkel in die gebou. Mense kan tot heelbo klim en foto’s van die see en pragtige landskap neem. Die vuurtoring is gebou om die vroeë ontdekkingsreisigers te help op hul pad vanaf die rowwe see van Kaap Agulhas. Jy sal 71 trappe moet klim om bo by die tweede oudste werkende vuurtoring in Suider-Afrika uit te kom, maar dit is die moeite werd.
Mense kom van oorsee en regoor die land om die punt van Afrika te kom besoek waar die Indiese Oseaan en Atlantiese Oseaan bymekaar kom. Dit is hierdie botsende strome wat die waters van Kaap Agulhas so gevaarlik vir seemanne maak.
Hierdie ikoniese baken word elke jaar deur duisende toeriste, inwoners en skool- groepe besoek. Daar is ook talle staproetes vir besoekers om te geniet sowel as meer 150 skeepswrakke langs die kus, soos die Zoetendal, Birkenhead en Arniston, wat jare gelede op die rotse geloop het.
Jy kan ook meer oor die groot verskeidenheid plantegroei leer.
Rasperpunt is een van die belangrike argeologiese terreine van Agulhas Nasionale Park se kuslyn. Die naam Rasperpunt kom van die feit dat die skerp rotse gereeld die vislyne van die hengelaars sny. Rasperpunt is gewild onder vandag se plaaslike vissers.
Mense gaan ook om die mooi wit klippies, wat unieke geluide maak wanneer die water tydens hoogwater oor die klippies spoel, te hoor. Tydens laagwater trek die water terug en hengelaars kan instap om vis te vang.