BESTE BANG EN SEER
Hoofpyne kom baie algemeen voor en dis belangrik om ’n deeglike mediese geskiedenis te doen. Dis belangrik om vas te stel wanneer jou hoofpyne begin het. Hoe gereeld dit voorkom, hoe lank dit duur en waar presies op die kop dit is (bo-op, langs die slape, ens). Stel vas of daar enige kopbeserings voorheen was van ongelukke of selfs ’n hou teen die kop. Enige ander siektes is ook relevant: hoë bloeddruk, diabetes, skildklierafwykings, epilepsie, allergieë soos sinusaandoenings en probleme met jou oë of ore kan hoofpyne meebring. Die gebruik van alkohol, rook van sigarette, ander dwelms en selfs sekere pille of medi- kasies kan ook die oorsaak wees.
Die hoofpyne wat die meeste volwassenes kry, staan bekend as spannings- of streshoofpyne omdat stres een van die oorsake is. Spanningshoofpyne kan episodies wees wanneer dit tussen 30 minute tot ’n week duur en kan gewoonlik vir minder as 15 dae per maand teenwoordig is.
Chroniese spanningshoofpyne word veroorsaak deur stres wat daagliks teenwoordig is. Dit kan vir ure duur en kom gewoonlik voor vir meer as 15 dae per maand vir ten minste drie maande. Spanningshoofpyne kan ook met migraines gepaard gaan, maar die verskil is dat spanningshoofpyne nie visuele steurings (flitsende ligte of blinde vlekke), naarheid, braking, maagpyn, swakheid of gevoelloosheid aan die een kant van die lyf of ’n sleeptong het nie.
Fisiese aktiwitiete vererger nie spanningshoofpyne nie, maar wel migraines. Spanningshoofpyne laat mense toe om nog hulle daaglikse take te verrig.
SIMPTOME: Spanningshoofpyne is ’n dowwe pyn in die kop of ’n gevoel van styfheid in die kop. Ander ervaar teerheid op die kopvel, nek en skouerspiere of selfs ongemak in hul kakebeen. Ander mense ervaar slaaploosheid, irritasie, kan nie konsentreer nie, chroniese moegheid en ligte sensitiwiteit vir geraas en lig.
OORSAKE: Die presiese oorsake is onbekend. Dit kan deur stywe spiere agter in die nek of kopvel, min rus, slegte postuur, emosionele stres, depressie, moegheid, hongerte of inspanning veroorsaak word. DIAGNOSE: Die diagnose van spanningshoofpyne is gebaseer op die inligting wat die pasiënt verskaf en ’n fisiese ondersoek. Daar is nie spesifieke toetse soos X-strale wat gedoen word nie. BEHANDELING: Dis goed om behandeling te begin wanneer simptome begin. Die meeste van die medikasie kan jy sonder voorskrif koop. Omdat stres een van die hoofoorsake is, is dit belangrik om dit te behandel. Dinge wat jy tuis kan doen en gebruik, is ’n warm handdoek of stort, yspakke, water, tee en koffie sonder kaffeïene, masseer jou kopvel, moenie rook nie, asem peppermint- of laventelolie in en oefen gereeld. Nie alle hoofpyne is skadeloos nie. Raadpleeg dadelik ’n dokter as jy die volgende simptome het. Dit kan meningitis of bloeding op die brein wees: 1. Gereelde hoofpyne wat skielik verander in intensiteit en baie verskillend as ‘‘ou gereelde”hoofpyne is 2. Hoofpyne wat gepaard gaan met koors, stywe nek, opgooi, dubbelvisie, spraakafwykings en as jy deurmekaar raak. 3. Hoofpyne wat baie vererger ná ’n hoofbesering.
Aangesien hoofpyne jou dubbel laat sien, is dit belangrik om ’n dokter te raadpleeg vir ’n deeglike ondersoek. Skryf inligting van die pyn neer voor die doktersbesoek sodat jy nie belangrike feite van die pyn vergeet nie. Sterkte.
Die hoofpyne wat die meeste volwassenes kry, staan bekend as spanningsof streshoofpyne omdat stres een van die oorsake is.