SJOKOLADESTERRETJIE-KOLWYNTJIES
Lewer 12 kolwyntjies
BESTANDDELE Vir die kolwyntjies
150 g sagte botter 1 koppie strooisuiker (castor sugar) 4 eiers 1 ¼ koppie bruismeel (selfraising flour) ½ koppie kakao
Vir die sjokoladesterre
1½ koppie koekmeel ¾ koppie kakao 1 teelepel kaneel ½ teelepel bakpoeier ½ koppie donkerbruinsuiker 1 eier, liggies geklits 75 g botter, gesmelt 1 eetlepel water (meer indien nodig) 2 x 150 g blokke donker- of melksjokolade Gekleurde sprinkels
Vir die versiersel
250 g botter 4 koppies versiersuiker (icing sugar) 3 eetlepels kakao 1 teelepel vanilla essence
Vir die samestelling
Goue en silwer balletjies Eetbare glitter, rooi, goud of silwer
METODE
Vir die kolwyntjies: Plaas al die bestanddele vir die kolwyntjies in die mengbak van ’n elektriese menger en meng goed. Voer die holtes van ’n 12 gat-kolwyntjiepan met papierhouers (ek het 12 goue foeliekolwyntjiehouers gebruik) en verdeel die deegmengsel tussen die holtes. Bak vir 20 minute in ’n voorverhitte oond van 180 º C. Haal die kolwyntjies uit en pak op ’n draadrak uit om heeltemal af te koel.
Vir die sterretjies: Sif die koekmeel, kakao, kaneel en bakpoeier saam in ’n groterige mengbak. Roer die suiker by en maak ’n holte in die middel. Giet die eier, botter en water in die holte en meng goed om ’n stywe deeg te vorm. Rol die deeg op ’n meelbestrooide oppervlak uit en gebruik ’n klein sterkoekievorm om sterretjies uit te druk. Plaas ’n entjie uitmekaar op bakplate wat met bakpapier gevoer is en bak vir 8 – 10 minute in ’n voorverhitte oond van 180 º C. Laat effens afkoel op die bakplate en pak op draadrakke om heeltemal af te koel. Doop die bokant van die koekie in gesmelte sjokolade en versier met sprinkels voor die sjokolade kans kry om te set.
Vir die versiersel: Klits al die bestanddele vir die versiersel goed saam totdat jy ’n lekker romerige mengsel het. Skep die mengsel in ’n spuitsak en spuit ’n paar swierige krulle op elke kolwyntjie of gebruik ’n slaplemmes om dit op elke kolwyntjie te smeer. Vir die samestelling: Druk ’n sterretjie in die versiersel op elke kolwyntjie en versier met balletjies en glitter.