In die tuin:
Alles wat jy van rose wil weet
ie roos is ongetwyfeld die wêreld se gunstelingblom. Rose word veral met vroue vereenselwig en met Moedersdag om die draai, is dit nuttig om te weet watter kleur rose jy vir jou dierbare ma kan gee en wat dit beteken. ’n Bos volgroeide rose simboliseer dankbaarheid uit die diepte van jou hart. ’n Ruiker is daarom die perfekte manier om vir jou ma dankie te sê vir al haar onvoorwaardelike liefde, omgee en harde werk. Anna Jarvis, wat beskou word as die stigter van Moedersdag, het 500 angeliere (carnations), haar ma se gunstelingblom, na die ma’s van die Andrews Methodist Episcopa-kerk, West Virginia, Amerika gestuur.“Die wit carnation word verkies, want dit simboliseer waarvoor ’n ma staan. Die witheid, haar reinheid; die duursaamheid, haar getrouheid; die geur, haar liefde; hoe wyd dit groei, haar vrygewigheid; die vorm, haar skoonheid,” het sy gesê. So meng rose met angeliere as geskenk op Moedersdag. Peony-rose: Dit is rond met welige blomblare waarvan Ma sal hou. Hulle is ook groter as die gewone rose en kom in verskillende kleure, so jy kan haar gunstelingkleur koop. Donkerpienk rose: As jy verkies om ’n helder verklaring van dankbaarheid te maak, dan is hierdie roos jou beste opsie. Hierdie rose gaan jou ma se dag sommer baie ophelder.
Perskekleur rose: Die kleur inspireer ’n warm en feestelike atmosfeer wat perfek is om jou ma se dag te maak. As jy nie voorspelbaar met pienk wil wees nie, maar haar tog wil verras met ’n sagte en vroulike kleur, is perskekleur die een om haar mee gelukkig te maak.
Geel rose: Jy kan nie verkeerd gaan hiermee nie. Dit lig gemoedere en simboliseer vreugde en omgee. As jou ma ’n lewenslustige persoonlikheid het, is geel perfek vir haar. En as sy ook jou bestie is, slaan jy die spyker op die kop, want geel verteenwoordig ook vriendskap.
Ligpienk rose: Dit simboliseer vreugde en bewondering. Die sagte kleur is vroulik, vars en fyn. Sy gaan beslis die betekenis van die roos waardeer.
Pers rose: Met hul koninklike kleur, stuur pers rose die boodskap dat ma jou koningin is. Wat ’n wonderlike manier om jou “queen mother” te vier.