Wat sê die kenner?

Joy Clarke ,’ n verhoudings terapeut van Kaapstad, verduidelik ons almal het’ n behoefte aan veiligheid – beide fisies en emosioneel, asook ’n behoefte om te behoort. Hierdie behoefte is belangrik vir oorlewing, veral van jou hart, siel, gedagtes en liggaam. Sy sê liefde is ’n geskenk, maak nie saak op watter ouderdom jy dit vind nie.

Navorsing het bewys ons raak verlief op iemand wat ons help om te groei. Joy meen mense plaas baie druk op hulself om al hul lewensmaat se behoeftes te bevredig, hetsy seks, romanse, liefde, vriendskap of finansies, maar dit is ’n Hollywood-weergawe van verhoudings. Geen mens kan al daardie behoeftes vir iemand anders bevredig nie. Liefde is in die klein, alledaagse dingetjies.“Om daar te wees vir iemand sê alles – in swakheid en wanneer jy sterk is, in hartseer en vreugde, is wat liefde werklik beteken ,” verduidelik sy. Verder kan dit wees dat die vrou dalk ’n vaderfiguur soek en dat die man die geleentheid aangryp om weer een te wees, maar, meen Joy, dit is algemeen in enige verhouding: ons hoop ons volwasse verhoudings sal ons gesond maak van die wonde wat ons ouers gelos het. Joy verduidelik hierdie verhouding kan beslis werk as albei maats bereid is om te groei, mekaar in ag te neem en die kyke van die buitewêreld ignoreer.

Sy sê dit vat baie moed om te erken hulle is lief vir mekaar, ten spyte van ouderdom en die wêreld.