Mini-wafels met nuggets

Lewer omtrent 20 nuggets en wafels

BESTANDDELE Hoender

4 ontbeende hoenderfilette 1 koppie meel 2 eetlepels hoenderspeserye 2 eiers, geklits 2 koppies broodkrummels

Wafel

2 eiers, geskei 1 eetlepel suiker ’n Knippie sout 2 eetlepels gesmelte botter ½ koppie melk 1 koppie bruismeel (selfraising flour) 1 teelepel bakpoeier Stroop of sous vir opdiening

METODE Hoender

Kap die filette plat met ’ n koekroller en sny dan in happiegrootte stukkies. Plaas die meel in ’ n plat bak, die geklitste eier in ’n tweede bak en die krummels in ’n derde bak. Geur die hoender met die hoenderspeserye en doop om die beurt in meel, eier en broodkrummels. Pak op ’n bakplaat en verkoel vir 30 minute. Braai alkant in vlak olie tot gaar en bruin.

Wafel

Klits eierwitte totdat punte vorm en hou eenkant. Meng eiergele, suiker, sout, botter en melk saam. Roer bruismeel en bakpoeier by die nat bestanddele tot gemeng. Vou eierwitte in by die beslag. Bak eetlepels van die beslag op ’n warm wafelpan. Stapel die wafels en hoender om die beurt en bedruip met goue stroop of soetrissiesous. Bedien dadelik.

WENK: Vir ’n vullende ligte ete, maak die wafels groter, die nuggets heel en bedien met groente.