BLOUKAASTERTJIES EN SLAAI
Lewer ongeveer 12 klein tertjies
BESTANDDELE
Kors 1½ koppies koekmeel ’n Knippie sout 6 eetlepels botter Yswater Vulsel 3 eetlepels crème fraîche (of gewone room) 1 koppie melk 2 eiers plus 1 eiergeel Sout en varsgemaalde swartpeper na smaak 50 g romerige bloukaas Slaai 1 Granny Smith-appel, stronk verwyder en in skyfies gesny (met skil en al) 1 Pink Lady-appel (of ander rooi appel), stronk verwyder en in skyfies gesny (met skil en al) Blare van jou keuse (die fyner tipe werk die beste) ¹/3 koppie geroosterde okkerneute, grofgekap ¼ koppie mayonnaise 1 eetlepel suurlemoensap 2 eetlepels water 50g romerige bloukaas
METODE
Kors: Sif die koekmeel en sout saam en vryf die botter met jou vingerpunte in totdat dit soos growwe mieliemeel lyk. Giet bietjies-bietjies yswater by en meng totdat jy ’n sagte hanteerbare deeg het. Bedek met kleefplastiek en laat vir 30 minute in die yskas rus. Rol die deeg uit op ’n meelbestrooide oppervlak. Gebruik ’n koekiedrukker om sirkels uit te druk wat groot genoeg is om die holtes van ’n patty pan-pannetjie te voer. Verkrummel die kaas en verdeel dit tussen die 12 deegdoppies.
Vulsel: Klits die crème fraîche, melk en eiers saam en geur met sout en peper. Giet in die deegdoppies oor die kaas. Bak vir 15 – 20 minute in ’n voorverhitte oond van 200°C.
Slaai: Rangskik die appelskyfies op die blare op elke bord. Sprinkel die okkerneute bo-oor. Klits die mayonnaise, suurlemoensap, water en die kaas goed saam totdat jy ’n gladde mengsel het. Bedruip die slaai daarmee en bedien die tertjies langsaan.