KOFFIE-ROOMTERTJIES
Lewer 12 tertjies
BESTANDDELE
Kors 1½ koppies koekmeel ’n Knippie sout 6 eetlepels botter Yswater Vulsel 1 x 230 g mascarpone (of roomkaas) 2 eetlepels room 1 eetlepel kitskoffiekorrels 1 eetlepel bruinsuiker 100 g donkersjokolade, gesmelt Sjokolade vir garnering, gerasper
METODE
Kors: Sif die koekmeel en sout saam en vryf die botter met jou vingerpunte in totdat dit soos growwe mieliemeel lyk. Giet bietjies-bietjies yswater by en meng totdat jy ’n sagte hanteerbare deeg het. Bedek met kleefplastiek en laat vir 30 minute in die yskas rus. Rol die deeg uit op ’n meelbestrooide oppervlak. Gebruik ’n koekiedrukker vir sirkels wat groot genoeg is om die holtes van ’n patty pan-pannetjie te voer. Plaas sirkels bakpapier bo-op die deegdoppies en giet keramiekbakbone of gewone droëbone of rys bo-op. Bak in ’n voorverhitte oond van 200°C vir 10 miniute. Verwyder die bakpapier en bone en bak oop vir nog 5 – 7 minute of tot goudbruin en bros. Pak uit op ’n draadrak en laat afkoel.
Vulsel: Roer die mascarpone, room, koffie en suiker in ’n bak tot net-net gemeng. Hou eenkant. Skep gesmelte sjokolade in die tertdoppies. Laat staan om effens te stol. Gebruik ’n roomyslepel om bolletjies te vorm van die mascarpone-mengsel. Skep bo-op die gesmelte sjokolade. Sprinkel sjokolade bo-oor en bedien.