IN DIE NUUS
Die afgelope vakansieseisoen het ’n paar gebeure groot nuus gemaak. Sommige het die trane laat rol terwyl ander die monde laat oophang en ons steeds aan die praat het! IN PUIN GELÊ Meer as 200 mense is dakloos gelaat toe lekkende vlamme op Nuwejaarsdag die prentjiemooi Morawiese sendingstasie Wupperthal naby Clanwilliam verswelg het. Die verwoestende brand, wat omstreeks 17:00 uitgebreek het, het verskeie strukture insluitend 53 huise en agt historiese geboue verwoes. Die Morawiese kerk het die vlamme vrygespring. Die polisie ondersoek ’ n saak van brandstigting, maar niemand is nog in verband met die voorval in hegtenis geneem nie. UNHAPPY NUWE JAAR Mense van die Overstrand het ook die Nuwejaar op ’n hartseer noot ingegaan toe ’n man se beweerde poging om die Nuwejaar met ’n fakkel in te lui op ’n wegholbrand uitgeloop het.
Shelton April (34) het na bewering middernag ’ n noodfakkel afgevuur in die Overstrand-gebied in die Wes-Kaap laat ontstaan het. Die brand het in die Overberg-kusgebied uitgebreek en na gebiede naby Bettysbaai, Pringlebaai, Hangklip en Rooi Els versprei en erge skade aangerig. ’ n Inwoner van Pringlebaai het vermoedelik in die brand gesterf weens rookinaseming, maar teen druktyd was die nadoodse ondersoek nog nie afgehandel nie. Shelton het op 7 Januarie op ’n aanklag van die oortreding van die natuurbewaringswet in die landdroshof op Caledon verskyn. #SKAAP-GATE Gebeure op Clifton se Vierde Strand in Kaapstad het dié somer omtrent opslae gemaak. ’n Herrie het aanvanklik by dié rykmansstrand ontstaan toe twee privaat sekuriteitbeamptes van die sekuriteitsmaatskappy PPA na bewering op 23 Desember ’ n groep besoekers van die strand verwyder het. Die wagte se optrede het toe gelei tot verskeie protesaksies by dié strand. Die kersie op die koek was toe lede van #FeesMustFall-beweging ’n skaap daar slag om dit te reinig van enige “rassistiese geeste”. ’n Konfrontasie tussen wit en swart strandbesoekers het soos ’n veldbrand versprei en gewys hoe diep die land se rasseverlede nou seermaak. HIER KOM ONS JAY-ZEE! Oudpres. Jacob Zuma gaan sy lyf musiekkunstenaar hou nadat hy ’n ooreenkoms met die eThekwini-munisipaliteit geteken het om sy immergewilde Struggle-liedjies op te neem. Die ooreenkoms vorm deel van “die behoud van Suid-Afrikaanse erfenis” en sal die begin wees van die voormalige president se nuwe musiekloopbaan. Die opname sal na verwagting in April geskied en sal Zuma se gewilde liedjie, “Umhlaba’ wethu”, insluit wat hy op Madiba se begrafnis gesing het.