Mej. SA: Tamaryn Green werk hard met ’n glimlag
Dis harde werk om ’n skoonheidskoningin te wees, maar Tamaryn Green doen dit met grasie en ’n glimlag. DEUR TARREN-LEE HABELGAARN
Om ’ n skoonheidskoningin te wees is meer as net ’ n titel. Dis ’n voltydse werk en ’ n groot verantwoordelikheid wat die huidige Mej. Suid-Afrika, Tamaryn Green (24), dikwels van sonop tot lank ná sonsondergang besig hou. Dit laat haar min tyd vir haar geliefdes en boonop moes sy na ’n onbekende provinsie verhuis, maar sy gee glad nie om om dit te doen nie.
Dit het ook letterlik ’n nuwe wêreld vir haar oopgemaak. Danksy haar titel reis sy nou die wêreld vol, ontmoet sy invloedryke mense wat haar meer in die afgelope ses maande geleer het as waarvoor sy ooit kon hoop.
Toe sy ’n jaar gelede vir die Mej. SuidAfrika-kompetisie ingeskryf het, was Tamaryn net ’ n gewone meisie en mediese student van die Paarl. Sy sou nooit kon droom dat sy in die suksesvolle hoëhakskoene van skoonheidskoninginne soos Amy Kleinhans-Curd, Jo-Ann Strauss en Liesl Laurie sou volg nie. Voordat dié beeldskone vroue die kroon op hul koppe gesit het, het niemand ook hul name geken nie. Daarna het hulle nie net op tydskrifvoorblaaie gepronk en bekendes geword nie, hulle het ook suksesvolle be- sighede gevestig.
Skoonheidskompetisies maak deure oop, maar jy moet steeds baie hard werk om bo aan die suksesleer te kom en daar te bly. ’n Mooi gesig gaan jou net sover bring in die lewe.
Sukses beteken verskillende goed vir verskillende mense en in hierdie stadium is Tamaryn trots op wat sy in haar jaar as Mej. Suid-Afrika vermag en ervaar het.
Tamaryn sê sy het byvoorbeeld nie gedink sy sou ooit pres. Cyril Ramaphosa ontmoet, voor die Verenigde Nasies se Algemene Vergadering in New York ’n spreekbeurt kry, een van die seremoniemeesters by die Wêreldunie se Konferensie oor Longgesondheid in Amsterdam wees nie of as die naaswenner in die Mej. Heelal-skoonheidskompetisie uit 93 van die wêreld se mooiste vroue gekies word nie.
MEJ. HEELAL
Oor haar Mej. Heelal-ervaring kan Tamaryn nie uitgepraat raak nie. “Toe ek op die verhoog uitstap, was dit ’n onbeskryflike gevoel. Ek het net ’n kalmte gehad en ek was so opgewonde en trots om my land te kan verteenwoordig. Ek is nooit senuweeagtig wanneer ek op ’ n verhoog moet stap nie, want ek laat dit alles aan God oor. En daardie aand by Mej. Heelal het ek vertrou dat alles in God se hande is en deel van Sy plan vir my lewe is,” sê Tamaryn.
Sy sê daar was soveel ondersteuning vir Suid-Afrika in die gehoor. Baie oë was ook op Suid-Afrika omdat ons eie DemiLeigh Nel-Peters die vorige jaar as Mej. Heelal gekroon is.
Maar sy het nooit toegelaat dat die druk van verwagtinge haar onderkry nie.
“Ek en Demi-Leigh is twee verskillende voorbeelde van ’ n Suid-Afrikaanse vrou. Ek wou my eie ervaring en journey beleef, so ek het my nie baie aan die voorspellings gesteur nie. Dit het ook baie gehelp dat ek saam met Mej. Thailand ’ n kamer gedeel het, want as die verteenwoordiger van die gasheerland was daar ook baie druk op haar en kon ons dit deel,” sê Tamaryn.
En al het sy nie gewen nie, is Tamaryn gelukkig met hoe dinge uitgedraai het. Sy het haar beste gedoen en sê boodskappe van die publiek ná die tyd was vir haar bewys dat sy haar land trots gemaak het.
So ’n dag kan maklik van 05:00 tot 23:30 wees, maar jy leer om enige plek te kan slaap en stil te wees vir ’n oomblik om jou energie te behou. TAMARYN GREEN
Om vir Mej. Heelal voor te berei moes sy baie tyd saam met haar stilis en afrigter, Werner Wessels, deurbring. Saam het hulle met verskeie modeontwerpers gewerk vir haar rokke en nasionale kostuum. Hulle moes ook op meer as 20 ander uitrustings besluit vir haar onderhoude en uitstappies tydens haar twee weke in Thailand, voor die kompetisie. Sy het ook met ’ n fiksheidafrigter gewerk aan veral haar bene en moes ook met ’ n afrigter werk om haar loopplankstap perfek te kry.
As mediese student en iemand wat tuberkulose (TB) oorwin het, het gesondheid haar nog altyd na aan die hart gelê. Tamaryn gebruik nou haar skoonheidsplatform om nóg meer van ’n verskil te maak en glo sy sou dit nie kon doen as sy net ’n mediese student was nie.
Sy het dalk ’ n skoonheidkompetisie gewen, maar Tamaryn sê dit gaan nie net oor ’n mooi gesig en ’n slank figuur wat goed op die loopplank en in advertensies lyk nie. Dit gaan oor hart en intelligensie en hoe jy al jou verskillende talente kan gebruik om ’n goeie verteenwoordiger vir belangrike kwessies kan wees.
Jy moet jouself met selfvertroue kan uitspreek, jy moet weet waarvoor jy staan, jy moet jouself goed kan versorg en jy moet ’n goeie voorbeeld van jou land en sy mense wees, sê sy.
’N STEM VIR ANDER
“Die werk van ’ n Mej. Suid-Afrika is om op die hoogte te bly van belangrike sake wat jou land en sy mense raak, want sy moet ’n stem kan wees vir daardie mense wat nie ’ n stem het nie. Elke vrou het iets waarop sy wil fokus soos my #breakthesigma-veldtog wat op TB fokus en gedurende haar jaar werk elke Mej. SA baie aan haar veldtog om soveel van ’ n verskil moontlik in haar fokusarea te maak,” sê Tamaryn.
“Dit vat harde werk en jy skakel met baie mense om blootstelling en hulp te kry. Tussendeur woon jy geleenthede by en het jy ook ’ n verantwoordelikheid teenoor jou borge om ’ n goeie ambassadeur vir hulle te wees.
“Jy moet die hele pakket wees en dit beteken dat jy ook tyd moet maak vir oefen en gesond eet, sodat jy in die beste shape kan wees, maar ook om ander te kan aanmoedig om ’n gesonde leefstyl te volg.”
Sy vertel sy moes ook ander vaardighede aanleer soos hoe om lig te pak en uit ’ n tas te kan leef. Sy moes leer hoe om haar eie hare en grimering soos ’ n professionele persoon te kan doen. Want anders as wat mense dink, skrik Tamaryn nie elke oggend wakker met ’ n span ha-
re- en grimeerkunstenaars wat regstaan om haar op te tooi nie.
“Vanweë al jou verpligtinge reis jy baie en daar is nie altyd plek of ’ n span beskikbaar om oral saam met jou te kan gaan nie. Afhangende van wat die geleentheid is, is ek die meeste van die tyd verantwoordelik vir my eie hare en grimering.
“Ek het vir die eerste twee dae nadat ek gekroon is, ’ n span gehad wat my hare en grimering gedoen het, maar daarna moes ek self leer hoe om dit te doen,” sê sy vol selfvertroue.
Tamaryn se dae lyk ook nooit dieselfde nie en hoe haar dag verloop, hang meestal af van wat vir daardie dag beplan is.
As sy net een vergadering of geleentheid vir die dag het, gee dit vir haar tyd om deur haar e-pos te werk, gym toe te gaan of om via oproepe met haar familie en vriende op te catch. Maar op die dae wanneer sy nie so besig is nie, word dit ook gebruik om saam met haar stilis en span nuwe uitrustings te gaan aanpas vir haar volgende geleentheid.
’N BESIGE DAG
Op ’n dag wanneer sy besig is, begin sy die dag met oefening in die oggend. As sy nie tyd het om by ’n gym uit te kom nie, doen sy dit sommer by die huis of waar ook al sy is. Soms moet sy al 04:00 of 05:00 op wees, veral as sy ’n vroegoggend-vlug het en hare en grimering nog moet doen.
“So ’n dag kan maklik van 05:00 tot 23:30 wees, maar jy leer om enige plek te kan slaap en stil te wees vir ’n oomblik om jou energie te behou. Ek drink ook baie water en die oefening en gesond eet help ook baie.”
Sosiale media speel vandag ’n groot rol, want dit maak Mej. Suid-Afrika meer toeganklik vir mense. So Tamaryn probeer om soveel moontlik van haar reis met haar omtrent 285 000 Instagram followers te deel wanneer sy tyd kry. Die meeste van Mej. Suid-Afrika se amptelike sosiale media word deur die Mej. SuidAfrika-span gedoen.
Sy weet nie wat die toekoms inhou nie, maar as ’n meisie wat van ’n gewone staatskool in ’n bruin gemeenskap alles kan beleef wat sy in haar Mej. Suid-Afrikajaar beleef het, wil sy die boodskap uitstuur dat enigiets moontlik is.
Wanneer sy haar kroon binne die volgende paar maande oorhandig aan die nuwe Mej. Suid-Afrika, gaan Tamaryn terugkeer universiteit toe om haar mediese studies te voltooi. Daarna wil sy as ’n gekwalifiseerde dokter begin werk en voortgaan om ’n verskil te maak in haar land en haar medemens se lewe.