Soek só werk: Hulp met jou CV tot onderhoud
’n CV kan jou werkaansoek maak of breek, so verseker jy maak van die begin af die beste indruk. Hier is hulp van jou CV tot die onderhoud. DEUR CLYDE ADAMS-VISTER
Werksoek kan ’n baie stresvolle proses wees, want jy weet dit kan net een van twee uitkomste hê – jy gaan die werk kry of nie. Daarom moet werksoekers alles in hul vermoë doen om hulself die beste kans te gee. Met Suid-Afrika se hoë werkloosheidsyfer moet jy ook in ag neem dat daar altyd meer werksoekers as beskikbare poste is. Trouens, volgens Statistieke Suid-Afrika was ses miljoen mense tussen Januarie en Maart 2018 werkloos in die land.
Dis beslis ’ n senutergende proses van die oomblik dat jy jou curriculum vitae (CV) saamstel en die wêreld instuur tot jy hoor of jy die werk gekry het of nie.
Maar om dinge so ’n klein bietjie makliker te maak, het Kuier ’n bietjie gaan rondvra oor waarop werksoekers moet let as hulle hul droomwerk wil losslaan.
BESTE VOETJIE VOOR
Julie Boshoff, uitvoerende bestuurder van finansies en besigheidsaanleg by die nasionale werwingsmaatskappy Quest, sê werksoekers moet ondersoek instel oor ontwikkelings binne die bedryf waarin hulle belangstel, vrae vra en oplees oor die vereistes vir ’n betrokke pos.
Volgens haar is jou tyd en vaardighede waardevolle bates wat nooit vermors moet word nie en jy moet doen wat jy kan om jou vaardighede te verbeter.
Met vandag se tegnologiese vooruitgang en inligting wat beskikbaar is, kan ’n mens binne enkele dae basiese vaardighede opdoen deur dinge aanlyn te lees en te oefen. En om ’n bevredigende werkslewe te hê, moet jy iets soek wat jy weet jy sal geniet of iets wat jy dalk erva- ring of kwalifikasies in het, verduidelik Julie voorts.
Sosiale platforms moet ook reg gebruik word omdat werkgewers jou Facebook en LinkedIn nagaan en deur jou Twitter en Instagram loer. Julie sê dis omdat werkgewers wil weet wie jy is voordat jy oorweeg word en jy moet probeer om hulle nie teleur te stel nie. Dit is daarom belangrik om ’n goeie beeld van jouself te skep, nie net in persoon nie, maar ook aanlyn.
Jill Ockhuis, ’ n menslike hulpbronpraktisyn by Media24 in Kaapstad, is al 11 jaar in die bedryf en sê werkgewers wil weet watter vaardighede jy het en hoekom jy ’n bate vir die maatskappy sal wees, so dis die belangrikste oorweging as jy jou CV opstel. ’ n Kort bio wat inligting bevat soos jou vaardighede en kennis, relevante datums (studie- en indiensnemingstydsperke) sowel as werk- en opvoedinggeskiedenis, beskryf sy as die beste CV.
“Kandidate laat dikwels ’ n e-posadres uit en as jy nie telefonies bereikbaar is
Dís hoeveel mense tussen Januarie en Maart 2018 werkloos was in die land, volgens Statistieke Suid-Afrika.
nie, is e-pos die volgende opsie. Moenie verkeerde kontakbesonderhede gee nie. Inligting oor jou studies is baie belangrik en dui duidelik aan wanneer ’n kursus onvoltooid is, want dit lei tot verdere komplikasies in die werwingsproses. “Bied jou werkervaring aan van die jongste tot die oudste. Maak seker datums is korrek en as jy vir enige rede ’n werk gelos het, verduidelik dit om te voorkom dat die werkgewers tot hul eie gevolgtrekkings kom,” verduidelik Jill. Maar dan is daar ook “moenies” wanneer dit by CV’s kom. “Moenie pligte waarvoor jy verantwoordelik was, uiteensit nie. Tien jaar gelede se werkervaring is waarskynlik irrelevant vir die pos waarvoor jy nou aansoek doen, maar vir nuwe werksoekers is enige werkervaring ’n voordeel. Foto’s is nie ’ n vereiste nie en as jy besluit om van een gebruik te maak, sorg dat dit geskik is. Werwers spandeer beperkte tyd per CV, gebruik daarom net wat relevant is,” meen Jill. Verwysings is netso belangrik en Jill beveel aan dat jy ’ n verwysing opsit van ’ n maatskappy waar jy onlangs gewerk het. Stel ook die verwysingspersoon in kennis dat hulle op jou CV gelys is. “Jou CV is ’ n inleidende brief van jouself aan die werwer en moet in die eerstepersoon geskryf word. Gebruik ’ n persoonlike, professionele e-posadres en indien jy nie een het nie, stel een op. Jou kanse om ernstig opgeneem te word met ’ n e-pos-adres soos byvoorbeeld “slayqueen@xxxx.com”, is skraal. Van die beste CV’s wat ons gesien het, is slegs een of twee bladsye lank en is briljant uiteengesit met alle relevante inligting ingesluit,” sê Jill. Werksoekers moet hulle ook weerhou van CV-bedrog, want werkgewers gebruik verskeie sagteware om info op jou CV te bevestig. By Media24 gebruik Jill-hulle ’n sagteware-program Managed Integrity Evaluation (MIE). MIE check of jou kwalifikasies, burgerskap en ervaring eg is. Key Recruitment, ook ’ n nasionale werwingsagentskap wat spesialiseer in uit- voerende, inligtings- en digitale tegnologie, ingenieurswese, kreatiewe-, kantooren gasvryheidsloopbane, meen spesifieke sleutelwoorde wat van toepassing is op die werk en bedryf, moet duidelik uitstaan in jou CV.
“Ons hanteer duisende CV’s op ons databasisse en om te sif vir die perfekte werknemer, gebruik ons iets genaamd Boole-soektogte. Dit is wanneer ’n paar sleutelwoorde as filters gebruik word en die duisende CV’s word deursoek vir daardie spesifieke woorde. Daarom is dit belangrik om jou besonderhede duidelik te stel,” sê Allan Pike, ’n bestuurslid van dié agentskap.
ONDERHOUDE
Nadat jou CV sy werk gedoen het, is onderhoude die volgende senutergende stap in die werksoekproses. Volgens Allan wil onderhoudvoerders sien jy is goed voorberei en stel werklik belang in die pos en die maatskappy.
“Sorg dat jy die maatskappy en die pos goed bestudeer,” raai hy aan.
Oor jou klere en tyd sê Jill: “Dink wit hemp, cream chinos en ’n blou trui-tipelook of jou kerkklere. Deur ’n bietjie navorsing oor die kultuur van die maatskappy te doen, sal jy seker maak dat jy reg aangetrek is. ’n Paar minute laat met ’n verskoning sal ook nie deug nie, so wees betyds. Dis die eerste slegte indruk sonder om enige iets te sê, so maak seker jy is ten minste vyftien minute vroeg. As jy ’n uur laat gaan wees, bel die maatskappy en vra om die onderhoud te herskeduleer en gee jou rede. Dit is ’n beter opsie vir almal.”
Sy sê verder onderhoudvoerders wil nie oor jou ondervinding praat nie, maar oor jou vaardighede en vermoëns om die werk te verrig.
“Dink aan die vaardighede wat jy van ander werkgeleenthede verkry het en vertel hoe die vaardighede jou help slaag het in take of projekte. Dink oor watter vaardighede jy spesifiek vir hierdie werk sal gebruik. Jy moet in staat wees om te antwoord met spesifieke prestasies wat jy bereik het en as jy nie het nie, praat oor jou vaardighede en hoe jy dit gaan gebruik.”
Volgens haar is die belangrikste dat jy jou goeie eienskappe moet ken, want jy sal altyd gevra word om “meer oor jouself” te vertel. Oogkontak is ook belangrik, want dit wys jy het selfvertroue en dat jy gefokus is.
GROEI IN JOU ROL
Ons grootouers het waarskynlik 40 jaar lank by dieselfde werk gewerk, maar dis nie meer die geval nie. Statistieke SuidAfrika toon dat die gemiddelde werker net onder vyf jaar by ’n werk bly voordat hulle aanbeweeg. Hoewel dit nie noodwendig ’n slegte ding is nie, soek werwers wel mense wat in hul loopbaan wil groei binne die maatskappy.
Jill sê sodra jy die werk gekry het, moet jy elke dag probeer om iets nuuts aan te leer, verantwoordelikhede neem en jou mentors se kritiek waardeer.
“Slegs voortdurende leer gaan jou gekwalifiseerd maak in jou rol en hoewel jy vorige ervaring in die werk het, moet jy innoverend bly en nuwe vaardighede soek om aan te leer. Daar is altyd iemand wat beter en vroeër begin het of van ’n meer gesogte kollege gegradueer het, maar dit beteken nie dat jou kennis en ervaring nie waardevol is nie. Bewys aan jou werknemer wat jy aan hulle belowe het in die onderhoud.”
Dis belangrik om te onthou internskappe tel ook as professionele ondervinding en moet met dieselfde entoesiasme aangepak word as ’n actual werk. Dit maak nie saak of die internskap betaal of onbetaald is nie – ervaring is ondervinding en die vaardighede wat jy leer, sal lewenslank by jou bly, sê Jill.
Selfs al lewe ons in ’n desperate era waar almal skarrel vir ’n werkie, is daar tog iets wat jý kan doen om as die “droomwerknemer” uit te staan. So, begin vandag nog werk maak van jou werksoekproses!