Skeletspiere: Leer meer oor hoe jy beweeg
Sonder spiere sou ons net ’n hoop bene wees wat nie kon beweeg nie. Leer oor watter spiere jy gebruik wanneer jy hardloop en baie meer.
Wanneer jy hardloop kan jou liggaamstemperatuur tot tussen 38°C en 38,5°C styg.
Wanneer jy kos sluk, jou hart bloed pomp of jou arms swaai, gebruik jy spiere. Jy het gladde spiere en hartspiere, maar dis die skeletspiere wat jou laat beweeg. Enige beweging wat jy bewustelik doen, word deur jou skeletspiere uitgevoer. Met atletiek wat in die somer plaasvind, leer ons meer oor spiere, wat melksuur is, hoekom jy moet opwarm as jy oefen en ander interessante feite en geite oor jou spiere!
TÉ VEEL OEFENING
Melksuur is die rede hoekom jy voel jou spiere brand wanneer jy te hard oefen. Jy het altyd energie nodig om te beweeg en wanneer jou liggaam te veel beweeg soos wanneer jy hardloop of hard oefen, het dit nog meer nodig. Gewoonlik maak jou liggaam energie van die glukose (in die kos wat jy eet) en suurstof (aerobiese respirasie). Maar as jy uitasem is, jou liggaam vinniger energie nodig het en nie genoeg suurstof het nie, maak jou liggaam net energie van net die glukose (anaerobiese respirasie). Jou liggaam kan vir so drie minute anaerobiese energie maak, maar daarna is die melksuurvlak wat tydens die proses in jou spiere vrygestel word, te hoog. Dís wanneer jou spiere begin brand en jy ál stadiger beweeg. Dis jou liggaam se manier om jou teen erge moegheid en beserings te beskerm. Onthou wel, dis nie melksuur wat maak dat jou spiere seer is ná oefening nie. Dit gebeur wanneer jy skeurtjies in jou spiere het. Verminder melksuur in jou spiere deur goed asem te haal en water te drink terwyl jy oefen.
Skeletspiere help om jou liggaam in die regte posisie te hou.
Daar is meer as 600 skeletspiere.
Dis omtrent die helfte van jou gewig.